Üç aviaşirkət və iki təyyarə terrorizmə qarşı sanksiyalar siyahısından çıxarılıb
ABŞ İran İslam İnqilabı Keşikçiləri Korpusuna (SEPAH) bağlı üç aviaşirkəti və iki təyyarəni terrorizmə qarşı sanksiyalar siyahısından çıxarıb. AYNA.AZ xəbər verir ki, bu barədə “Reuters” ABŞ Maliyyə Nazirliyinin veb saytında dərc olunmuş məlumatlara istinadən məlumat yayıb.
Agentliyin xülasəsində hansı aviaşirkətlərin iştirak etdiyi göstərilməyib və Vaşinqton hələlik heç bir rəsmi açıqlama verməyib.
Bir neçə İran aviaşirkəti SEPAH ilə əlaqələrinə görə ABŞ-ın terrorizmə qarşı sanksiyalarına məruz qalır. Bunlardan ən böyüyü olan “Mahan Air” 2011-ci ildə “qara siyahı”ya salınıb. “Caspian Airlines”, “Meraj Air” və “Pouya Air” isə 2014-cü ilin avqustunda siyahıya əlavə edilib. Vaşinqton bu şirkətləri SEPAH və bölgədəki İranpərəst qruplar üçün silah, döyüşçü və pul daşımaqda ittiham edir.
Bir həftə əvvəl administrasiyanın siyasəti tam əksinə görünürdü. 30 iyulda ABŞ Maliyyə Nazirliyi Çin, Hindistan, Rusiya və İranda “Mahan Air”ə bilet satan və şirkətə logistika ilə kömək edən altı şirkət və şəxsə qarşı sanksiyalar tətbiq edib.
"SEPAH və ya “Mahan Air”ə maliyyə xidmətləri, logistika və ya kommersiya dəstəyi göstərənlər terrorçu müəssisəni dəstəkləməyə kömək edirlər", - deyə maliyyə naziri Skott Bessent o zaman bildirib.
Bir gün əvvəl nazirlik Hörmüz boğazında SEPAH-ın gəmi sahiblərindən təhlükəsiz keçid üçün pul tələb etdiyi bir reket sxemini aşkar edib. Ötən həftə “Reuters” agentliyi SEPAH-ın illərdir sanksiyalardan yayındığı və milyardlarla dollar qazandığı yeraltı qumar imperiyasını təsvir edib.
Sanksiyaların ləğvi dünya neftinin və mayeləşdirilmiş təbii qazın təxminən beşdə birinin axdığı Hörmüz boğazının açılması üçün danışıqların intensivləşməsi ilə üst-üstə düşüb.
İran artıq boğazdan nəqliyyatın hərəkətini demək olar ki, tamamilə dayandırıb və ABŞ özü İran limanlarını və Tehrana bağlı marşrutları bloklayır. Çərşənbə axşamı günü dövlət katibi Marko Rubio jurnalistlərə İran və Omanla uğurlu əlaqələr barədə danışıb: "Bu danışıqlarda irəliləyiş əldə edilib, lakin hələlik yekun nəticə yoxdur. Ümid edirik ki, bu, çox tezliklə baş verəcək".