“Kansler Almaniyanın Ukraynaya Rusiya təcavüzü qarşısında sarsılmaz həmrəyliyini bir daha təsdiqlədi”
Almaniya kansleri Olaf Şolts Almaniyada hökumət koalisiyasının dağılmasından sonra ilk dəfə Ukrayna Prezidenti Volodimir Zelenskiyə telefonla zəng edib. AYNA xəbər verir ki, Almaniya hökumətinin Mətbuat Xidməti bu barədə öz saytında məlumat yayıb. Bildirilib ki, müzakirə mövzuları Ukraynadakı hərbi və humanitar vəziyyət olub.
Eyni zamanda, Prezident Zelenski Berlinə hərbi yardıma, xüsusən də Ukraynanın hava hücumundan müdafiəsini gücləndirdiyinə görə təşəkkür edib.
“Federal kansler Almaniyanın Ukraynaya Rusiya təcavüzü qarşısında sarsılmaz həmrəyliyini bir daha təsdiqlədi. O, Almaniyanın avropalı və beynəlxalq tərəfdaşlarla sıx koordinasiya şəraitində Ukraynaya, o cümlədən hərbi sahədə dəstəyini davam etdirəcəyinə əmin edib”, - məlumatda vurğulanıb.
Olaf Şolts təslim edilməsi planlaşdırılan IRIS-T hava hücumundan müdafiə sistemlərinin altıncısının 2024-cü ilin sonuna qədər Ukraynaya çatacağını təsdiqləyib.
"Biz həmçinin gələn il hava hücumundan müdafiə sistemlərinin tədarükü və Almaniyadan hava hücumundan müdafiə sistemləri ilə əlavə yardımın perspektivlərini müzakirə etdik", - Ukrayna Prezidenti noyabrın 13-də axşam “Telegram”da yazıb.
Zelenski əlavə edib ki, Almaniyanın Reynland-Pfalz bölgəsində Ukraynaya hərbi dəstək verən Qərb tərəfdaşlarının görüşləri üçün “Ramstein” formatını saxlamaq üçün Şolts ilə razılaşıb. Ukrayna dövlət başçısı bildirib ki, Almaniya kansleri ilə söhbətində həmçinin “Braziliyada keçiriləcək G20 sammitində Ukraynanın ədalətli və davamlı sülhə dair baxışını təqdim etməyin zəruriliyini vurğulayıb” və Almaniyaya bu işdə Kiyevi dəstəkləməyə hazır olduğuna görə təşəkkür edib.