Oman sahillərində Rusiya tankerindən neft sızması 390 kvadrat kilometr əraziyə yayılıb
Ərəbistan yarımadası sahillərində ekoloji fəlakət baş verib. Rusiyanın köhnə tankerlərdən istifadə etməsi səbəbindən Avropa ölkələri və mütəxəssislər tərəfindən dəfələrlə xəbərdarlıq olunub. AYNA.AZ xəbər verir ki, “Reuters”in hökumətin açıqlamasına istinadən məlumatına görə, Omanın yaxınlığında sanksiya edilmiş tankerdən neft sızır və ləkə artıq təxminən 390 kvadrat kilometr əraziyə yayılıb.
Saratov, Xabarovsk və Krasnoyarsk kimi Rusiya şəhərlərində də oxşar hadisələr var.
“Reuters” qeyd edir ki, gəmi trafikinə dair məlumatlara görə, “Caroline Bezengi” Rusiya neftini daşıyırmış. O, Rusiyadan xam neftin daşınmasındakı roluna görə Avropa İttifaqı və Böyük Britaniyanın sanksiya siyahılarındadır.
“Caroline Bezengi”nin transponderinə son siqnal 11 iyunda Yəmən sahillərində alınıb. Lakin iki dəniz təhlükəsizliyi mütəxəssisi “Reuters”ə bildirib ki, tankerin heyəti ilk dəfə 8 iyunda Yəmənin Mukalla limanı yaxınlığında problemlər barədə məlumat verib. Onların sözlərinə görə, ilkin məlumatlar gəmidə partlayış baş verdiyini göstərir.
Omanın Ətraf Mühit İdarəsinin məlumatına görə, "Caroline Bezengi"dən sızan neft ləkəsi Oman adaları yaxınlığından materikə doğru uzanır və ən yaxın nöqtəsində materikdən 7 kilometr aralıda olub. İdarə öz sularında sızmanın qarşısını almaq üçün tədbirlər görür.
Agentliyin dəniz mütəxəssisləri ilə birgə apardığı peyk görüntülərinin təhlili göstərib ki, iyulun sonunda üzən tankerdən hələ də neft sızır.
Rusiyanın kölgə donanmasında sayı 1000-dən çox olan bir çox gəmi nasaz vəziyyətdədir və çox vaxt sığortası yoxdur.
Britaniya Xarici İşlər Nazirliyi ötən il bildirib ki, "kölgə donanması Putinin dənizləri çirkləndirməklə neft gəlirlərini qorumaq üçün çarəsiz və təhlükəli cəhdidir".
"Rusiya əsas təhlükəsizlik standartlarını nəzərə almayan və Avropanı böyük ekoloji fəlakətlər riski altına qoyan gəmilərdən istifadə edir", - qeyd edilib.
“Politico” və qeyri-kommersiya jurnalistika qrupu “SourceMaterial” tərəfindən 2024 və 2025-ci illərdə aparılan araşdırmalar Rusiya yüklərini dünyaya daşıyan tankerlərdən neftin sızması və Avropa sularına axıdılması hallarının dəfələrlə baş verdiyini aşkar edib.