Nazir: “Polşada iriçaplı sursat istehsalı bazasının genişləndirilməsi reallığa çevrilir”
Polşa Nazirlər Kabineti iriçaplı sursat istehsalının yaradılması üçün 3 milyard zloti (təxminən 750 milyon dollar) ayrılması haqqında qanun layihəsini təsdiqləyib.
AYNA xarici mediaya istinadən bildirir ki, bu barədə Polşa Müdafiə Nazirliyinin rəhbəri Vladislav Kosinyak-Kamış “X” sosial şəbəkə hesabında yazıb.
“Polşada iriçaplı sursat istehsalı bazasının genişləndirilməsi reallığa çevrilir. Nazirlər Kabineti qanun layihəsini qəbul etdi. Bunun nəticəsində Kapital İnvestisiya Fonduna 3 milyard zloti köçürüləcək”, - deyə nazir qeyd edib.
Xatırladaq ki, 2023-cü ilin yazında Polşanın əvvəlki hökuməti “Sursat Ehtiyatının yaradılması üzrə Milli Proqram” qəbul edib. Proqram sursatın xaricdə alınmasını, eləcə də ölkə daxilində istehsal sahələrinin yaradılmasını nəzərdə tutur.