“Türkiyə Azərbaycana mina təhlükəsi ilə bağlı dəstəyi davam etdirəcək”
“Uzun müddətdir ərazilərinin minalardan çirkləndirilməsinin ciddi təhdid yaratdığı Əfqanıstan kimi ölkələrlə bərabər, işğaldan azad etdiyi ərazilərində hələ də aşkarlanmamış çox sayda minaların olduğu Azərbaycanın təhlükəsizliklə bağlı narahatlıqlarını bölüşürük”. AYNA.AZ xəbər verir ki, bu barədə Türkiyənin Xarici İşlər Nazirliyinin (XİN) “X” hesabındakı paylaşımda qeyd edilib.
Bildirilib ki, minaların və partlamamış silah-sursatın bir çox ölkələrdə insanların həyatına təhlükə yaratmaqda davam edir: “Problem həmin ölkələrin sosial-iqtisadi inkişafına da ciddi təhdid yaradır, habelə, mədəni irsinin qorunmasında çətinliklərə səbəb olur”.
Bəyanatda Beynəlxalq və regional səviyyədə torpaq səthi və su hövzələrində yerləşdirilən minalarla mübarizəyə önəmli töhfələr verən bir ölkə olaraq Türkiyənin piyada əleyhinə minaların basdırılması, istehsalı, onlardan istifadə, habelə, bu qəbildən olan partlayıcıların zərərsizləşdirilməsini nəzərdə tutan Ottava müqaviləsi və bu sənədə uyğun olaraq həyata keçirilən əməkdaşlığı dəstəklədiyi vurğulanıb: “Ölkəmiz mina təhdidi ilə mübarizə aparan dövlətlərə istər quruda, istərsə də su hövzələrində verdiyi dəstəyi davam etdirəcək”.