Deputat: “Biz video oyunlar sahəsində tarixi faktların dəyişdirilməsinə imkan verməməliyik”
Rusiya Prezidenti Vladimir Putin tarixi hadisələr və “Rusiyanın dünyada yeri və rolu haqqında” “təhrif olunmuş fikirlərin” yayılmasının qarşısını almaq üçün kompüter oyunları bazarına nəzarətin yaradılmasına göstəriş verib. AYNA rus mediasına istinadən bildirir ki, müvafiq göstəriş Putinin “Rusiya Federasiyasının tarix təhsili sahəsində dövlət siyasətinin əsaslarının təsdiq edilməsi haqqında” fərmanında əksini tapıb.
Bundan əlavə, Putin vəzifələr arasında xarici təhsil rəqəmsal xidmətlərinin yerli analoqlarla əvəzlənməsini, Rusiyanın tarixinə dair materiallardan ibarət vahid platformanın yaradılmasını və yerli tarixi filmlərin istehsalını qeyd edib.
Fərmanda ruslar arasında tarixi savadın artırılmasının zəruriliyindən də danışılır. Buraya ölkədən kənarda olan vətəndaşlar da daxildir. Bunun üçün onlar tarixi-mədəni standartı, tarixin tədrisinin vahid metodikasını hazırlayacaq, “nasizm ideologiyasına mənfi münasibət formalaşdıran” əsərlər yaradacaqlar.
Putinin fikrincə, bütün bunlar “xarici dövlətlərin Rusiyanın dünya sivilizasiyasının inkişafına tarixi töhfəsini inkar etməyə və ya azaltmağa yönəlmiş qeyri-dost hərəkətləri” ilə əlaqədardır. O, Qərbi tarixi təhrif etməkdə və “tarixi saxtakarlıqlardan informasiya müharibəsində silah kimi istifadə etməkdə” ittiham edib.
Fərmanda tarix təhsili sahəsində dövlət siyasətinin əsas prinsiplərinə ənənəvi dəyərlərə arxalanmaq, Rusiyanın orijinal yolla inkişafını dərk etmək və ölkə xalqlarının tarixi birliyini dərk etmək daxildir.
Bundan əvvəl Putin xarici onlayn oyun tərtibatçılarını serverləri Rusiya ərazisinə köçürməyə məcbur etmək təklifini dəstəkləyib. O, həmçinin bu cür rəqəmsal məhsulların Rusiya qanunlarına uyğunluğunun monitorinqi üçün tədbirlər hazırlamağı tapşırıb.
Dövlət Dumasının deputatı Aleksandr Xinşteyn deyib ki, video oyunlar sahəsində tarixin təhriflərinə yol verilməməlidir, çünki onlar “təkcə idman intizamı deyil, həm də gənclərin təhsilinin elementlərindən biridir”.
“Biz video oyunlar sahəsində tarixi faktların dəyişdirilməsinə imkan verməməliyik. Buna görə də, belə bir mexanizmin inkişafı, xüsusən də indi sadəcə zəruridir. Biz özümüz olmasaq, tariximizi yalan və çirkin yozumlardan kim qoruyacaq?”, - deyə deputat qeyd edib.