“Ümid edirik ki, Ermənistandan Türkiyəyə dəmir yolu xidməti də ən qısa zamanda istifadəyə veriləcək”
"Ümid edirik ki, Ermənistanla Türkiyə arasında dəmir yolu tezliklə fəaliyyətə başlayacaq". AYNA.AZ-ın “Armenpress”ə istinadən məlumatına görə, bu sözləri Ermənistanın Baş naziri Nikol Paşinyan hökumət iclasında deyib.
"Bu müddət ərzində biz yeni nəqliyyat imkanları da əldə etmişik. Axalkalaki-Qars dəmir yolunun hər iki xətti fəaliyyətdədir. Mən bu məsələni Gürcüstanın Baş naziri ilə müzakirə etdim və o hər iki istiqamətdə heç bir problem olmayacağını təsdiqlədi. Biz bunu Türkiyə Prezidenti ilə də müzakirə etdik və o bu marşrutların açıq olduğunu təsdiqlədi. Ümid edirik ki, Ermənistandan Türkiyəyə dəmir yolu xidməti də ən qısa zamanda istifadəyə veriləcək. Bundan əlavə, TRIPP layihəsi bu imkanları əhəmiyyətli dərəcədə genişləndirəcək", - deyə Paşinyan bildirib.
Baş nazir həmçinin TRIPP layihəsinin təmin etdiyi infrastrukturdan danışıb: "TRIPP layihəsi çərçivəsində üç sahənin həyata keçiriləcəyini dəqiq bilirəm: dəmir yolu, avtomobil yolu və elektrik xətləri. Bu üç layihənin həyata keçiriləcəyinə 100 faiz əminəm. Digər iki sahəyə niyə daha az əminəm? Çünki bunlar resursların mərkəzləşdirilməsi və boru kəmərinin çəkilməsi kimi məsələləri əhatə edir. Bu məsələlər əsasən tərəfdaşlarımız tərəfindən həll edilməlidir. Bu üç layihənin həyata keçirilməsi özü-özlüyündə sülh deməkdir. Təsəvvür edin ki, biz Azərbaycana gedib-gəlirik, Azərbaycan da Ermənistandan keçir, qatarlar işləyir və sair. Bu, sülhdür".
Qeyd etmək lazımdır ki, Ermənistan hökumət rəsmiləri bu yaxınlarda Türkiyə vasitəsilə Livana humanitar yardım göndərmək planlarını açıqlayıblar. Marqara sərhəd keçid məntəqəsi bu məqsədlə bir neçə gün ərzində açıq olacaq.