“İndi “Ermənistanın dövlətçiliyini və suverenliyini itirməsinin qaçılmazlığı” kartı oynanılır”
Ermənistanla Rusiya arasında kəskinləşən münasibətlər erməni ictimaiyyətini narahat etməkdədir. İrəvandakı ekspertlər hesab edirlər ki, narahatlıq yaradan amil “Qarabağ klanı” kimi tanınan keçmiş hakimiyyətdə olanların – Robert Köçəryan və Serj Sarkisyanın fəaliyyətləridir. Ermənilər hesab edirlər ki, Rusiyanın Ermənistandakı “beşinci kolon”u olan Köçəryan-Sarkisyan dövləti Moskvaya təslim etmək üçün dəridən-qabıqdan çıxırlar – yetər ki, hakimiyyətə qayıtsınlar.
Erməni politoloq Tevos Arşakyan “Armenianreport”da yazdığı analitik yazıda bildirib ki, Ermənistanın Qərblə yaxınlaşması fonunda İrəvanla Moskva arasında uçurum aradan qalxmaz hala gəlir: “Deyilənlərə əlavə kimi, məsələn, Ermənistan Parlamentinin sədri Alen Simonyanın dekabrın 19-da KTMT Parlament Assambleyası Şurasının Moskvadakı iclasında və 16-cı plenar iclasda iştirakdan imtina etməsini əlavə edə bilərik. Xatırladaq ki, bundan əvvəl Paşinyan özü KTMT-nin Moskva sammitində iştirakdan imtina etmişdi. Erməni tərəfinin Rusiyanın himayəsi altında keçirilən tədbirləri boykot etməsi ölkəmizin Qərblə yaxınlaşması ilə paralel gedir. Bu isə, təbii ki, Ermənistanı öz təsir orbitindən çıxarmaq istəməyən Moskvanı narahat etməyə bilməz. İndi İrəvan Qərbə doğru addımlarını dayandırmasa, “Ermənistanın dövlətçiliyini və suverenliyini itirməsinin qaçılmazlığı” kartı oynanılır. Və bu məsələdə Rusiyaya ikinci Prezident Robert Köçəryanın başçılıq etdiyi böyük “beşinci kolon” fəal şəkildə kömək edir. Köçəryan Moskvanı razı salmaq üçün Ermənistanın müstəqilliyinə xələl gətirməkdə davam edir və bunu gizlətmir”.
“Daha doğrusu, hətta ailəsi də bunu gizlətmir. Belə ki, atasının tərəfdarlarının parlamentin qarşısına sürüklədiyi oğlu Levon Köçəryan jurnalistlərə açıqlamasında deyib ki, “Robert Köçəryan fəaldır, görüşlər keçirir, müzakirələr aparır, yeri gələndə açıqlama verəcək”. Və davam edir: “Atam kənara çəkilmədi. Son illərin reallığı onun üçün çox çətin olub”. Yəni Robert Sedrakoviç hakimiyyətə qayıtmaq üçün indiki hakimiyyətə həlledici zərbə vurmaq üçün qüvvələr toplayır. Təbii ki, həmişə kuklası olduğu Moskvanın fəal köməyi ilə”, - deyə Arşakyan vurğulayıb.
“Mənə maraqlıdır, doğrudanmı imperiya üçün Köçəryan və Sarkisyandan yaxşısı yoxdur? Doğrudanmı Moskva başa düşmür ki, onların hər ikisinin hakimiyyətə qayıtmaq şansı yoxdur? Bu ikisi o qədər cinayətlərə görə məsuliyyət daşıyırlar, ölkə əhalisi hələ də onlara qarşı o qədər nifrət hissi keçirir ki, onların ağalarına birincinin hakimiyyətini necə bərpa edəcəyi tam aydın deyil? Hətta Ter-Petrosyanın Paşinyanın əvəzinə hökumətə rəhbərlik etmək şansı Köçəryan və Sarkisyan cütlüyündən daha çoxdur”, - deyə analitik əlavə edib.
Onun sözlərinə görə, hələ 2018-ci ilin avqustunda Köçəryanın siyasətə qayıtması ilə bağlı bəyanatı yəqin ki, Ermənistandakı bir çoxları üçün də qəribə görünüb: “O Paşinyan hökumətini korrupsiyada və iqtisadiyyatın uğursuzluğunda ittiham etməyə başladı. Həmin günlərdə Köçəryanı dinləyəndə mənə elə gəlirdi ki, o Ermənistanda həmin vaxt hökm sürən ümumi qarışıqlıqda öz yerini tapmağa can atırdı. 2021-ci ildə Köçəryan parlamentə növbədənkənar seçkilərdə qalib gəlmək üçün bütün gücünü və böyük maliyyəsini səfərbər etdi, lakin səslərin yalnız 20%-dən bir qədər çoxunu toplaya bildi. Hazırkı hakim “Mülki müqavilə” partiyası isə 53% səs topladı. Hətta 44 günlük müharibədə biabırçı və ağrılı məğlubiyyətdən sonra. Belə biabırçılıqdan sonra Köçəryan susmalıdır, amma yox. Siyasi mübarizəyə fəal şəkildə müdaxiləyə davam etdi. Köçəryan cəmiyyətdə hakimiyyətdən narazılığın və məyusluğun getdikcə artdığını hiss etdi, amma əsas məsələni nəzərə almadı - insanlar onlara daha çox nifrət edirlər. Hətta kimsə “Nikolsuz Ermənistan” şüarını canlandıra bilsə belə, Ermənistanın başına Köçəryan- Sarkisyan qayıtmayacaq. Erməni cəmiyyətinin onlara ümidləri yoxdur. Necə deyərlər, yaşadıq, gördük. Çətin ki, hansısa ağıllı adam Köçəryan və Sarkisyan dövrünə qayıtmaq istəsin. Cəmiyyət Paşinyandan nə qədər məyus olsa da, şübhəsiz ki, vəziyyətin yaxşılaşdırılmasına ümidlərini Köçəryan və Sarkisyana bağlamayacaq. Axı onlarla birlikdə 6 ildir aradan qaldırmağa çalışdığımız bütün pisliklər geri qayıdacaq”.
“Bundan əlavə, onların qaytarılması Ermənistanın suverenliyinə son zərbə olacaq - biz nəhayət Belarusun analoquna, hətta Rusiya Federasiyasının subyektinə çevriləcəyik. Xalqımız buna heç vaxt imkan verməyəcək. Bunu Köçəryan, Sarkisyan və onların arxasında duran qüvvələr başa düşürmü? Çətin ki... Nəyin bahasına olursa-olsun, hətta çevriliş və keçmiş hakimiyyətin bərpası bahasına da olsa, Ermənistanı Rusiyanın təsir orbitində saxlamaq istəyirlər. Amma həm keçmişlər, həm də onların kuratorları hələ də başa düşmürlər ki, burada nə onlara maddi imkanlar, nə təbliğat vasitələri, nə də xüsusilə kiçik mitinqlər kömək edəcək. Nə demokratiya qaydalarına görə, nə də inqilabi-zorakı üsullara görə şansları yoxdur”, - Arşakyan fikrini tamamlayıb.