Qırıcı təyyarə hissələrinin Çinin əlinə keçməsi halları araşdırılır
Çin Avstraliyadan ABŞ-a tranzit zamanı izaholunmaz şəkildə Honkonqa yönləndirilmiş Amerika F-35 gizli qırıcı təyyarəsi üçün vacib hissələri müsadirə edib. AYNA.AZ xəbər verir ki, bu barədə “Bloomberg” məlumatlı mənbələrə istinadən məlumat yayıb.
Agentliyin mənbələrinə görə, logistika şirkəti UPS yoxlama və mümkün təmir və ya utilizasiya üçün ABŞ-a göndərilən Kral Avstraliya Hərbi Hava Qüvvələrinə məxsus F-35 qırıcı təyyarəsinin örtüyünü və silah bölməsinin qapısını daşıyırdı.
İki mənbə “Lockheed Martin Corp.” tərəfindən istehsal edilən hər iki hissənin təyyarənin gizliliyini artırmaq üçün radar udma materialı ilə örtüldüyünü aydınlaşdırıb.
Mənbələrdən biri nəqliyyat təyyarəsinin ABŞ-a gedərkən Cənubi Koreyada dayandığını və oradan yükün Honkonqa yönləndirildiyini söyləyib. Mənbənin sözlərinə görə, təyyarənin Cənubi Koreyada niyə dayandığı, yükün niyə Honkonqa göndərildiyi və istiqamət dəyişikliyinin qəsdən və ya təsadüfən olub-olmadığı hələ də məlum deyil.
İki mənbəyə görə, Çin hakimiyyəti sonradan bu hissələri müsadirə edib, lakin hələ də geri qaytarmayıb.
Agentliyin qeyd etdiyi kimi, bu hadisə ilə bağlı xəbərlər hər iki ölkə üçün siyasi cəhətdən həssas bir vaxtda ortaya çıxıb. Çərşənbə axşamı Çin lideri Si Cinpin ABŞ Prezidenti Donald Trampın dəvəti ilə ABŞ-a dövlət səfəri edib. ABŞ Konqresinin ən azı iki komitəsi - Xarici İşlər Komitəsi və Silahlı Qüvvələr Komitəsi - qırıcı təyyarə hissələrinin Çinin əlinə keçməsi hallarını araşdırır.