Tofiq Zülfüqarov: “Döyüşə hazır bir Ermənistan ordusu yaratmaq üçün Rusiya illik hərbi büdcəsinin 20-25%-ni xərcləməlidir”
Ermənistan rəhbərliyinin indiki davranışı onların siyasətlərinin bütün siyasi prosesi öldürdüyünü başa düşmələri ilə əlaqədardır. Bunu AYNA-ya Azərbaycanın keçmiş Xarici İşlər naziri Tofiq Zülfüqarov, Ermənistanın Baş Naziri Nikol Paşinyanın Qarabağa səfərini şərh edərkən deyib.
“Bir məmurun Qarabağa hər hansı bir səfəri, Ermənistanın Azərbaycan ərazilərini işğal etməsinin sübutudur. Bu məqamı Azərbaycanın suveren hüquqlarının və beynəlxalq hüquq normalarının necə pozulduğunu göstərmək üçün vurğulayıram”, - o bildirib.
Zülfüqarovun sözlərinə görə, indi Qarabağ münaqişəsi əlaqədar bütün prosesin hərbiləşdirilməsi müşahidə olunur: “Bunlar, ilk növbədə, könüllü müdafiə bölmələrinin yaradılması barədə danışıqlardır. Diqqət yetirdinizsə, Paşinyanın səfərinin əsas istiqaməti cəbhə bölgəsinə və qoşunların təmas xəttinə ziyarət idi. Paşinyan müdafiə siyasətindəki boşluqlara təsir göstərmək və doldurmaq üçün Ermənistanın hərbi güclənməsi mövzusunu müzakirə etdi. İşğal olunmuş bütün ərazilərin ilhaqı Ermənistan rəhbərliyinin siyasətinin əsas xəttidir. Bu səbəbdən də münaqişənin siyasi həlli ilə əlaqəli bütün mövzular bu gün aktual deyil”.
Sabiq nazir əlavə edib ki, Ermənistanın bütün bu istəkləri ilk növbədə Naxçıvan istiqamətində müdafiə strategiyasındakı zəif nöqtələri doldurmağa yönəlib: “Anlayırlar ki, siyasətləri ikinci bir cəbhə açıb və burada vurğulamaq lazımdır ki, Naxçıvandan İrəvana cəmi 40 kilometr məsafə var. Buna görə mülki müdafiə və könüllü birləşmələri təşkil etmək üçün belə qızğın cəhd göstərirlər. Erməniləri bu qədər qızğın bir şəkildə hərbiləşdirən başqa bir məqam da Rusiyanın münasibətidir. Ermənilər başa düşdülər ki, Rusiya müharibə əsnasında onlara ya heç bir yardım etməyəcək, ya da bu yardım son dərəcə məhdud olacaq və ermənilər öz imkanlarına etibar etməli olacaqlar”.
Diplomatın fikrincə, Rusiya döyüşə tam hazır bir erməni ordusu yaratmaqda maraqlı deyil: “Çünki bu vəziyyətdə Rusiyanın özünə ehtiyac qalmayacaq. Əslində, Paşinyan “Hard Talk” proqramında bu barədə bəhs edərək bildirdi ki, kifayət qədər silahı və döyüşə hazır ordusu olacaqsa, Rusiyaya ehtiyac qalmayacaq. Buna görə də Rusiya heç vaxt Ermənistanı müasir silahlarla təchiz etməyəcək və özünə tabe edəcək”.
Tovuz hadisələrindən sonra Rusiyadan Ermənistana hərbi tədarüklərdən danışan Zülfüqarov bu hadisənin daha çox təbliğat xarakteri daşıdığını düşünür: “Bu tədarüklərin Ermənistan ordusunun vəziyyətini əhəmiyyətli dərəcədə dəyişdirə biləcəyinə inanmıram. Çatdırmalar Rusiyadakı ermənipərəst dairələrin Kremlin Ermənistanı dəstəklədiyini göstərmək üçün atdığı bir addımdır. Azərbaycan güclü, döyüşə hazır ordu yaratmaq üçün külli miqdarda pul xərcləyir. Müharibəyə hazır olan və ən yeni texnologiyalara sahib Ermənistan ordusu yaratmaq üçün Rusiya illik hərbi büdcəsinin, təxminən 20-25%-ni xərcləməlidir. Niyə bunu etsin ki? Üstəlik, Rusiya-Ermənistan münasibətləri böhran içindədir. Buna görə bütün bu hərbi təchizat cəbhədəki vəziyyəti ciddi şəkildə dəyişdirmir”.
Müsahibimiz eyni zamanda, Türkiyənin bölgədə bir tarazlıq rolunu oynadığını qeyd edib: “Türkiyə Naxçıvanın mövcud statusunun birmənalı qarantıdır. Düşünmürəm ki, bu cür şəraitdə, Rusiya rəhbərliyində, hətta ermənilər naminə olsa belə, Türkiyə ilə döyüşməyə razı olacaq insanlar olsun. Bu, onların regional məsələlərdəki maraqlarına uyğun gəlmir”.