Deputatdan hökumətə çağırış: “O adamların kölgəsindən çıxın”

İqtisadiyyat

13.11.2019 - 14:35

Zahid Oruc: “İnsanları şərləyirlər, bizneslərini ələ keçirməyə cəhd edirlər”

 

“Biz son iki ildə yeni iki Baş Nazirin iştirakı ilə yeni büdcə layihəsini müzakirə etmişik. Heç şübhəsiz ki, burada bir məna var. Cənab Prezident ötən 10 illər ərzində Azərbaycanın əldə etdiyi uğurlarla yanaşı, yeni çağırışları qarşıya qoyub. Ciddi mənada hökumətdə dəyişikliklərə gedilib. Nazirlər Kabinetinin yeni tərkibindən cənab Prezidentin son bir ayda qabarıq şəkildə irəli sürdüyü çağırışlarla daha artıq məşğul olmasını gözləyirik”.

 

AYNA xəbər verir ki, bu açıqlamanı, parlamentin bu günkü plenar iclasında, deputat Zahid Oruc verib. O bildirib ki, hökumət keçmiş Nazirlər Kabinetində yer alan şəxslərin kölgəsindən çıxmağı bacarmalıdır: “Cənab Prezident yeni elitanı formalaşdırır. Bu, həm də hökumət və dövlət strukturklarını əhatə etməkdədir. Yeni elitanın formalaşmasına hamı öz töhfəsini verməlidir. Düşünürəm ki, ölkə başçısının irəli sürdüyü tələblərdən biri haqsız rəqabəti aradan qaldırmaqdır”.

 

“Prezidentin öz ifadəsi ilə söyləsək, bir sıra hallarda insanları şərləyirlər, bizneslərini ələ keçirməyə cəhd edirlər. Özləri üçün üstün iqtisadi şərait yaradırlar. Bu, təbii ki, aradan qaldırılmalıdır”, - deyə Z.Oruc vurğulayıb.

Müəllif: Ayna.az