“Bir bağlamanın dəyəri əsasında rüsum alınması qərarı uğursuz sayıldı” - Rüfət Quliyev
Milli Məclisin İqtisadi siyasət, sənaye və sahibkarlıq komitəsinin üzvləri şəxsi istifadə üçün rüsumsuz malların gətirilməsi qaydalarının sərtləşdirilməsini müzakirə edirlər. Bu barədə AYNA-ya Milli Məclisin deputatı, iqtisad elmləri doktoru, professor Rüfət Quliyev məlumat verib.
303 saylı müvafiq qərar avqustun 21-də Baş Nazir Əli Əsədov tərəfindən imzalanıb. Quliyevin sözlərinə görə, artıq eyni şəxsin adına beynəlxalq bağlama və ya digər daşıma şirkətləri vasitəsilə 30 gün ərzində Azərbaycanın gömrük sərhədinə çatdırılan malların ümumi dəyəri ilə bağlı məsələyə aydınlıq gətirilib. Xatırladaq ki, son qərar rüsumsuz həddi 1000 dollardan 300 dollara endirib.
Lakin burada vacib bir nüans olduğunu deyən Quliyev məsələni belə izah edib: “Limit ay boyu gətirilən bütün alış miqdarı üçün deyil, bir bağlama üçün hesablanır. Bir bağlamanın qiyməti 300 dollardan az olsa belə, bir ay ərzində sonrakı çatdırılma üçün bu məbləğ nəzərə alınmayacaq. Bir bağlamanın dəyəri əsasında vergi toplanması üzrə təcrübələr parlament komitəmizin üzvləri tərəfindən uğursuz hesab edildi. Vətəndaşlar limiti keçmədən istənilən sayda bağlama ala bilər və onlardan vergi ay ərzində gətirdikləri rüsumsuz həddən yuxarı olan bütün malların məbləğindən tutulmalıdır. Komitəmizin üzvləri də gömrük və digər əlaqəli ödənişlərə daha sadələşmiş yanaşmanın zəruriliyi ilə bağlı konsensusa gəldilər. Tam məsuliyyətlə bildirirəm ki, bu baxımdan vətəndaşlar üçün rahat olan sadələşdirilmiş bir yanaşma təmin ediləcək”.
Müsahibimizin sözlərinə görə, üçüncü gündür ki, parlamentin İqtisadi siyasət, sənaye və sahibkarlıq komitəsi Nazirlər Kabinetinin “Fərdi şəxslər tərəfindən istehsal və ya kommersiya məqsədləri üçün nəzərdə tutulmayan malların gömrük sərhədindən keçirilməsində güzəştli və sadələşdirilmiş qaydalara” edilən dəyişiklikləri müzakirə edir: “Müzakirələr onlayn şəkildə aparılır, millət vəkilləri bir sıra vacib məsələlərdə konsensus əldə etməyə çalışırlar. Hesab edirəm ki, sənəddə hələ də işlənməsi məcburi olan nüanslar qalıb”.
Deputat parlament komitəsinin sədri Tahir Mirkişilinin artıq Dövlət Gömrük Komitəsinə yazılı sorğu göndərdiyini də qeyd edib: “Deputatlar Dövlət Gömrük Komitəsindən iqtisadi hesablamaların yer aldığı qəbul edilən qərarla bağlı arqumentləri əks etdirən cavab da alıblar. İndi deputatlar təqdim olunan arqumentləri öyrənirlər. İkinci onlayn iclas gözlənilir ki, o da Dövlət Gömrük Komitəsi nümayəndələrinin iştirakı ilə keçirilə bilər”.
“Müzakirə olunan məsələlərlə bağlı ümumi rəyə gəlmək üçün parlament komitəsinin üzvlərinə ən çox üç-dörd gün lazımdır. Biz bu dilemmanı hərtərəfli həll etmək istəyirik. Bunun üçün millət vəkilləri özləri üçün digər məqamları aydınlaşdırmalı, razılığa gəlməlidirlər. Yalnız bundan sonra daha kiçik və orta sahibkarların zərər görməməsi üçün atılacaq sonrakı addımlar barədə danışa bilərik. Hər hansı başdansovdu bir qərar qəbul etməkdən çəkinirik, amma çox çalışırıq ki, növbəti addımlar atılsın və Dövlət Gömrük Komitəsi və Nazirlər Kabineti ilə əlaqə saxlanılsın”, - R.Quliyev vurğulayıb.
Onun sözlərinə görə, parlament komitəsinin mütəxəssisləri, analitiklər məsələnin maliyyə tərəflərini araşdırırlar: “Düşünürlər ki, necə etsinlər, bütün bunlar iqtisadiyyata zərər vermədən, ancaq insanların, cəmiyyətin və sahibkarların maraqları nəzərə alınmaqla reallaşsın. Düşünürəm ki, gələn həftə rəsmi müraciət yayılacaq, məsələ komitəmizin iclasına təqdim ediləcək, o zaman son addımları əlaqələndirməyə başlayacağıq. Çünki bir qrup deputatın və komitənin rəyi heç də bütün parlamentin rəyi demək deyil”.
Xatırladaq ki, ölkədə fərdi istifadə üçün gətirilən malların idxalı üçün rüsumsuz hədd endirilib. Azərbaycan Respublikasının Nazirlər Kabineti "Fərdi şəxslər tərəfindən güzəştli və sadələşdirilmiş nəqliyyat qaydaları"na müvafiq dəyişikliklər edib. Dəyişikliklərə əsasən, hər təqvim ayı ərzində bir dəfə güzəştli şərtlərlə respublikanın gömrük ərazisinə gətirilə bilən malların ümumi dəyəri 1500 dollardan 800 dollara endirilib. Bundan əlavə, 30 gün ərzində beynəlxalq gömrük bağlamaları və ya digər göndərmə şirkətləri vasitəsilə eyni şəxs üçün Azərbaycanın gömrük sərhədinə çatdırılan malların ümumi dəyəri 1000 dollardan 300 dollara endirilib.
Ölkəni tərk edərkən Azərbaycan vətəndaşları milli valyutada (kağız və metal əskinaslar) və qiymətli kağız şəklində 20 000 və daha çox miqdarda ixrac üçün yazılı gömrük bəyannaməsi verməlidirlər. Ayrıca, ziyarət zamanı və ya poçtla şəxslər tərəfindən Azərbaycan ərazisinə gətirilən mobil telefonlar və digər simsiz rabitə avadanlıqları üçün də yazılı bəyannamə tələb olunur. Dəyişikliklər 19 sentyabr 2020-ci ildən qüvvəyə minəcək.