"Aİ bütün bu sahələrdə əlavə dəstək və təcrübə verməyə hazırdır"
Avropa İttifaqı (Aİ) Ermənistan və Azərbaycan arasında son bir ildə əldə edilən irəliləyişi alqışlayır. AYNA.AZ xəbər verir ki, bu barədə Aİ Xarici İşlər Xidmətinin sözçüsü Anita Hipper bildirib.
Hipper bildirib ki, "Sülh sazişi layihəsinin paraflanması və 8 avqust 2025-ci ildə sülh prosesi haqqında birgə bəyannamənin imzalanması Azərbaycan və Ermənistan arasında münasibətlərin tam normallaşdırılması istiqamətində tarixi addımlar olub".
Onun sözlərinə görə, tərəflər o vaxtdan bəri əhəmiyyətli irəliləyişlər əldə ediblər. O, nailiyyətlər arasında Aİ ticarət və tranzit məhdudiyyətlərinin aradan qaldırılmasını, saxlanılanların azad edilməsini və "Sülh Körpüsü" təşəbbüsü çərçivəsində Ermənistan və Azərbaycan nümayəndələri arasında əlaqələrin intensivləşdirilməsini vurğulayıb.
Eyni zamanda, Brüssel əldə edilən razılaşmaların həyata keçirilməsinin, eləcə də sülh sazişinin imzalanması və təsdiqlənməsinin vacibliyini vurğulayıb.
Aİ həmçinin Ermənistan və Azərbaycan arasında əlaqələrin gücləndirilməsinin, ticarətin genişləndirilməsinin və enerji sektorunda əməkdaşlığın inkişaf etdirilməsinin vacibliyini qeyd edib.
Hipper sərhəd delimitasiyası və demarkasiyası prosesinin davam etdirilməsinin, humanitar məsələlərin həllinin və iki cəmiyyət arasında barışıq istiqamətində işlərin aparılmasının vacibliyini bildirib.
Hipper qeyd edib ki, "Aİ bütün bu sahələrdə əlavə dəstək və təcrübə verməyə hazırdır".
8 avqustda ABŞ, Ermənistan və Azərbaycan 8 avqust 2025-ci ildə Ağ Evdə keçirilən Sülh Zirvəsinin birinci ildönümünü ilə bağlı birgə bəyanat yayıblar. Qeyd olunur ki, ABŞ tərəfindən dəstəklənən birgə bəyannamə Ermənistan və Azərbaycana sülhün möhkəmləndirilməsi, rifaha nail olmaq və tərəfdaşlıqlarını dərinləşdirmək üçün aydın yol xəritəsi təqdim edib. Bu cəsarətli liderlərin görüşməsindən keçən il ərzində ölkələr daha da uğur qazanmaq üçün təməl qoyublar.