Hakimiyyətdən 10 mart sürprizi

Hakimiyyətdən 10 mart sürprizi

Siyasi düşərgə baş verən dəyişiklikləri necə qarşılayır?

 

Məlum olduğu kimi, bu gün altıncı çağırış Azərbaycan Respublikası Milli Məclisinin ilk iclası keçirilib. İclasda Yeni Azərbaycan Partiyası (YAP) tərəfindən deputat Sahibə Qafarovanın Milli Məclisin sədri kimi namizədliyi irəli sürülüb və o, səsvermə nəticəsində Milli Məclisin sədri seçilib.

 

Bununla yanaşı, Parlamentin vitse-spikerləri də dəyişilib. Belə ki, Əli Hüseynli sədrin birinci müavini, deputatlar Adil Əliyev və Fəzail İbrahimli isə sədr müavinləri seçiliblər.

 

Parlamentin sədarətinin tam tərkibdə dəyişməsi ictimaiyyət arasında gözlənilməz olub, xüsusilə S.Qafarovanın sədr seçilməsi sürpriz kimi qarşılanıb. Beləliklə, Parlamentdə bu gün baş verənlər bir sıra suallar meydana gətirib. Məsələn, Milli Məclisin yenilənən rəhbərliyi siyasi arenaya hansısa yeniliyi gətirəcəkmi? Mövzuya siyasətçilərlə AYNA tutmağa çalışdıq.

 

Ağ Partiya sədri Tural Abbaslı hesab edir ki, Parlamentin rəhbərliyində kimlərin təmsil olunması xalqı o qədər də maraqlandırmır: “Cəmiyyətin hazırkı Parlamentə münasibəti xoş deyil. Yəni ən mütərəqqi hesab olunan deputat belə, spiker seçilsəydi, yenə də həmin spikerə münasibət ümumi Parlamentə münasibətin tərkib hissəsi olaraq qalacaqdı. Çünki heç kim iddia edə bilməz ki, Sahibə Qafarova Oqtay Əsədovdan daha fərqli spiker olacaq, yaxud da Adil Əliyev Ziyafət Əsgərovdan daha fərqli performans sərgiləyəcək. Məlum olduğu kimi, yeni sədarət ümumi siyasi kursun icraçılarıdır. Yəni əsas siyasi kursun və siyasi baxışın dəyişməsidir. Lakin təəsüf ki, hələlik bunu görümürük”.

“2015-ci ildə V çağırış Parlament formalaşanda belə bir fikir var idi ki, Parlamentin ömrü uzun olmayacaq. Amma həmin Parlament 5 ilə qədər fəaliyyət göstərdi. İstənilən halda, bu Parlament nə qədər tez buraxılsa, bir o qədər müsbət olar, nəinki, bir neçə il sonra. Yəni Parlamentin tərkibindən nə qədər tez imtina olunsa və ədalətli seçkilər keçirilsə, daha yaxşı olar”, - deyə Abbaslı vurğulayıb.

 

Vətəndaş və İnkişaf Partiyasının (VİP) sədri Əli Əliyev hakimiyyətin son dövrlərdə atdığı addımları şərh etməkdə çətinlik çəkdiyini bildirib: “Yeni qərarı anlaşılmaz addımlardan doğan mövqe kimi dəyərləndirirəm. Necə olur ki, Milli Məclis islahatlara qeyri-adekvat elan olunur, amma həmin adekvatların əksəriyyəti yenidən Parlamentin tərkibində saxlanılır. Bundan əlavə, Rusiya dünyanın aparıcı siyasi qütbü elan olunur, amma seçkidən sonra birinci səfər Avropa İttifaqının 3-cü əsas iqtisadi ölkəsi olan İtaliyaya və dini mərkəz olan Vatikana olur. Yəni hakimiyyətin addımlarını anlamaq çox çətindir”.

 

“Sahibə Qafarovaya gəlincə isə, onun ictimai mövqeyini heç vaxt müşahidə etməmişəm. Hər halda Parlamentin spikeri 124 deputatı idarə etmək bacarığında olan şəxs olmalıdır. Lakin onun idarəçiliyi necə olacaq, bu barədə nəsə demək hələlik tezdir. Məhz bu baxımdan, mənim üçün də gözləniməz oldu ki, bu qərar hansı meyarlara əsasən qəbul edilid”, - deyə Əliyev əlavə edib.

 

Ümid Partiyasının sədri İqbal Ağazadə isə seçimdən təəccüblənmədiyini diqqətə çatdırıb: “Parlamentdə çoxluq Yeni Azərbaycan Partiyasına məxsusdur. Seçimi də YAP özü müəyyənləşdirib. Lakin ilk dəfə partiya azlığından olan bir nəfər sədarətə seçildi ki, bu da maraqlı konfiqurasiya oldu. O cümlədən azlıqda olan siyasi partiyaların nümayəndələri komitə sədrlərinin müavinləri seçildilər ki, bunlar da maraqlı məqamlardır”.

“Amma Parlamentin sədarəti ilə bağlı daha yaxşı hakimiyyət nümayəndələri bilərlər. Görünür ki, hakim komandanın rəhbərinin bu istiqamətdə gözləntiləri fərqlidir. Prezident yeni tərkiblə işləməklə, yeni kadrları vəzifəyə gətirməklə islahatların davamlı olduğunu göstərmək istəyir. Amma Paralement rəhbərinin dəyişməsi nəyisə dəyişməyəcək. Çünki mövcud iqtidarın vahid siyasi kursu var və Parlament rəhbərinin kimliyindən asılı olmayaraq, həmin siyasi kursun davam etməsi istiqamətində addımlar atılacaq. Ona görə də spikerin kim olması mənim üçün elə də maraqlı deyil və bu seçimin arxsında heç bir siyasi gediş axtarmıram”, - Ağazadə vurğulayıb.

 

Gələcək Azərbaycan Partiyasının (GAP) sədri Ağasif Şakiroğlu isə qərarın gözlənilən olduğunu deyib: “Rəhbər heyətin dəyişməsi, əslində gözlənilən idi. Onsuz da Parlament buraxılanda bildirilirdi ki, Parlament Prezidentin yeni siyasi xəttinə uyğun deyil və ona görə buraxılır. Yəni köhnə spiker islahatlara uyğun olsaydı, ümumiyyətlə yeni seçkilər keçirilməzdi”.

 

“Doğrudur, yeni Parlamentdə, demək olar ki, köhnə Parlamentin deputatları yer aldılar. Amma görünən odur ki, ölkə başçısı əvvəlki insanlarla işləmək istəmir. Yeni təyin olunan insanlar, sözün həqiqi mənasında pozitiv deputatlardır. Düzdür, yeni spikerin ictimai-siyasi həyatda geniş rolu ilə tanış deyiləm. Amma digər deputatlar seçicilərlə işləyən deputalardır. Ən azından əvvəlki müqəvva Parlament rəhbərliyindən indiki rəhbərlik daha sağlam görünür”, - Şakiroğlu əlavə edib.

Müəllif: Mərahim Nəsib      10 Mart 2020 19:30
Siyasət bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin