Dünyanın gözü önündə qətliam: “Bu, faşizm ideologiyasının davamıdır”

Dünyanın gözü önündə qətliam: “Bu, faşizm ideologiyasının davamıdır”

Azər Qarayev: “Həmin qərarı qəbul edənlər tezliklə qanun qarşısında cavab verməlidirlər”

 

Avstraliyada meşə yanğınlarında 1 milyard başa yaxın müxtəlif növ heyvan tələf oldu. Bu itkinin ardınca Avstraliya hökuməti belə qərar verdi ki, quraq ərazilərdə olan 10 minə yaxın dəvə mərhələli şəkildə öldürülsün. Bu qətliamla bağlı verilən qərara səbəb kimi dəvələrin mövcud su hövzələrini insanların “əlindən alması” göstərilib.

 

Təbii fəlakəndə milyonlarla heyvan ölür, Avstraliya buna görə qan ağlayır. Bir tərəfdən isə insanlar öz əlləri ilə başqa canlıları qətl edirlər. Bu qərar nə dərəcədə ədalətli və humanistdir? Heyvanlar arasındakı ayrı-seçkiliyə, diskriminasiyaya niyə etiraz edilmir?

 

Heyvanların Müdafiəsi İctimai Birliyinin sədri, ekoloq Azər Qarayev AYNA ilə söhbətində baş verən dəvə qətliamından danışıb.

 

“Baş verənlər təəssüf doğurur və vəhşi təbiətdəki dəvələrin öldürülməsi  birmənalı şəkildə heyvanlara qarşı ayrı-seçkilikdir. Dünyada ikili standartın tətbiqi deməkdir. Zaman-zaman insanlara qarşı bu ayrı-seçkilik edilir və bunu insan haqları deyib müdafiə etmək imkanlarımız var. Amma heyvanlara qarşı ayrı-seçkiliyi hər hansı qanunla tənzimləmək iqtidarında deyilik. Bəs, hansısa heyvan növlərini öldürməyi kimlər sifariş edirlər? Müəyyən təşkilatlar var ki, heyvanların haqlarına qeyri-ciddi yanaşır, onlar konservasiya ideyasını irəli sürür, daha üstün heyvan növünün saxlanmasına və ya yox edilməsinə qərar verirlər”, - müsahibimiz bildirib.

Onun sözlərinə görə, bu yanaşmanın nəticəsidir ki, bu gün Avstraliyada faşizm yanaşması hökm sürür və dəvələrin qətliamı davam edir: “Ölkənin hökuməti bu vəhşicəsinə addımına belə haqq qazandırır ki, guya su hövzələrinin qorunması üçün dəvələr öldürülür. Çox məntiqsiz və acı gülüş doğuran bəhanədir. Çox istəyərdim ki, bu qərarı verən insanlar tezliklə dünyada ədalətli şəkildə qanun qarşısında cavab versinlər. Bu, faşizm ideologiyasının davamıdır, necə ki, hansısa millətin üstünlüyü üçün başqa millətlər öldürülür, yox edilir, irqi ayrı-seçkilik siyasəti yürüdülür, eləcə də o düşüncəni heyvanlar üzərində tətbiq edirlər”.

 

“Bəs beynəlxalq heyvanları müdafiə təşkilatları niyə susur” sualını cavablandıran Qarayev deyib ki, nüfuzlu beynəlxalq Vəhşi Təbiəti Müdafiə Təşkilatının da zaman-zaman belə ağlasığmaz “xidmət”ləri, təşəbbüsləri olub: “İstəyirəm, həmin “xidmət”lərdən birini xatırladım. 70-ci illərdə ağ kərkədan adlı heyvan brokanyerlərin “əməyi” sayəsində yoxa çıxmaq üzrə idi. Həmin heyvanın buynuzundan tibbdə istifadə olunurdu. Bu təşkilat Honkonqun institutlarından birinə sifariş verdi ki, bu heyvanın öldürülməsinin qarşılısının alınması üçün alternativ tapsınlar. İnstitut da araşdırmalar apardı, Xəzərin sahillərində məşkunlaşan antilopun bir növü olan sayqa (saiga) adlı heyvanı tapdılar. Bundan sonra sayqanın (erkəkləri) ovlanmasına başladılar. Bunun nəticəsində 90-cı illərin sonuna və 2000-ci ilin əvvəlinə qədər populyasiyası 100 minlərlə olan sayqa nəsli kəsilmək təhlükəsi ilə üzləşdi. Həmin müddətdə Xəzərsahili dövlətlər də təşvişə düşdü. Müəyyən qabqlayıcı tədbirlər görməyə başladılar”.

 

Təşkilat rəhbəri heyvanlara qarşı qətliamları yolverilməz hesab edir: “Heç bir ölkə bu addımı atmamalıdır, fauna qorunursa, bütün canlıları ilə birlikdə qorunmalıdır. Buna bənzər hallar vaxtilə Sovet Azərbaycanında da yaşanırdı. Ekologiya Komitəsinin Şirvan qoruğunda (İndiki Şirvan Milli Parkı) ceyranları qorumaq üçün hər il oradakı yırtıcı heyvanları - canavarları, çaqqalları öldürürdülər. O vaxt heyvanların mühafizəsi cəmiyyəti kimi bizim dəfələrlə etirazımız, gərgin mübahisələrimiz olmuşdu. Axı, canlılar hamısı vəhşi təbiətin, ekosistemin üzvüdür, bu ekozənciri bilərəkdən qırmaq, istədiyin kimi qurmaq olmaz! O vaxtlar beynəxalq təşkilatın konvensiyalarına uyğun olaraq bizim müadfiə tədbirlərinə dəstək verildi”.

 

“Bizim “Qırmızı kitab”a düşən heyvanlarımızın çoxu indi də yox olmaq təhlükəsi ilə qarşılaşır. 2000-ci illərdə suitiləri ilə bağlı araşdırma aparmışdıq, sahilyanı balıqçılardan soruşurduq ki, “niyə suitiləri ovlayırsınız”. Bizə verilən cavablara təəccüb edirdik. Balıqçılar deyirdilər ki, “onları bizə lazım olan balıqları yediyi üçün ovlayıb öldürürük”. Sivil cəmiyyətdə insanların belə cılız düşüncəsi ilə qarşılaşmaq sadəcə təəssüf doğurur və acınacaqlısı odur ki, bu düşüncədə insanlar indi də çoxluq təşkil edir”, - deyə ekspert vurğulayıb.

Müəllif: Raminə Eyvazqızı      18 Yanvar 2020 16:51
Dünya bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin