Tovuzdakı dəhşətli hadisə barədə rəsmi açıqlama

Tovuzdakı dəhşətli hadisə barədə rəsmi açıqlama

Faktla bağlı təqsirkar şəxs üçün aşkar surətdə köməksiz vəziyyətdə olan adamı qəsdən öldürmə maddəsi ilə cinayət işi başlanıb

 

Baş Prokurorluq ötən ilin noyabrında itkin düşən və yanmış meyiti aşkarlanan azyaşlı qızla bağlı rəsmi məlumat yayıb. Qurumun mətbuat xidmətindən AYNA-ya verilən məlumata görə, Tovuz rayonunun Dondar Quşçu kəndində anadan olmuş, 2010-cu il təvəllüdlü Quliyeva Nərmin Şərif qızının 21 noyabr 2019-cu il tarixdə itkin düşməsi ilə əlaqədar aparılmış araşdırmalarla onun qəsdən öldürülməsinə kifayət qədər əsaslar müəyyən edilib.

 

Bu səbəbdən Baş Prokurorluğun Ağır cinayətlərə dair işlər üzrə istintaq idarəsində Cinayət Məcəlləsinin 120.2.9-cu (təqsirkar şəxs üçün aşkar surətdə köməksiz vəziyyətdə olan adamı qəsdən öldürmə) maddəsi ilə cinayət işi başlanıb.

 

Yanvarın 6-da azyaşlının Dondar Quşçu kəndi ərazisində yanmış meyitinin aşkar olunması ilə əlaqədar dərhal Daxili İşlər Nazirliyinin, Baş Prokurorluğun, Ədliyyə Nazirliyinin Məhkəmə Ekspertizası Mərkəzinin və Səhiyyə Nazirliyinin Məhkəmə-Tibbi Ekspertiza və Patoloji Anatomiya Elmi-Təcrübi və Tədris Birliyinin təcrübəli əməkdaşları Tovuz rayonuna ezam olunublar.

 

Hazırda iş üzrə cinayəti törətmiş şəxs və ya şəxslərin müəyyən edilməsi istiqamətində zəruri və təxirəsalınmaz istintaq-əməliyyat tədbirləri davam etdirilir.

 

Qeyd edək ki, ötən il noyabrın 21-də Tovuz rayonunda itkin düşmüş 10 yaşlı Quliyeva Nərmin Şərif qızının meyiti bu il yanvarın 6-da Dondar Quşçu kəndində tapılıb. O, noyabrın 21-də qonşudakı toydan evə gedərkən yoxa çıxıb. Bu günlərdə qızın, üzərində yanıq xəsarətləri olan meyiti aşkarlanıb.

Müəllif: Ayna.az      7 Yanvar 2020 11:23
Hadisə bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin