Mühafizəkarların israrı ölkəni böhrana sürükləyib

Mühafizəkarların israrı ölkəni böhrana sürükləyib

Marketlərdə məhsul seçimi azalıb, milli valyuta dəyərdən düşür, işsizlik artır

 

Britaniyada Boris Consonun başçılıq etdiyi mühafizəkarlar ölkənin Avropa İttifaqından (Aİ) çıxmasını (Brexit) tezləşdirmək üçün, hökuməti erkən parlament seçkilərinə razı sala bildi. Eyni zamanda, Torilərin (İngiltərədə indiki Mühafizəkarlar Partiyasının əsasını təşkil edən siyasi partiyanın adı – red.) əsas opponenti olan, müxalifətçi İşçi Partiyası Böyük Britaniyanın Aİ-dən çıxması ilə bağlı ikinci referendum keçiriləcəyini vəd edərək, bunun məcburi olacağı barədə təminat verdi.

 

Baş Nazir Boris Conson tərəfindən təqdim olunan hakim Mühafizəkarlar Partiyasının seçki manifestində isə əksi deyilir: "Brexitin həyata keçirilməsinin yeganə yolu parlamentdəki Mühafizəkarlar Partiyasından keçir".

 

O bildirib ki, Mühafizəkarlar 12 dekabr seçkilərində qalib gəlsə, Aİ ilə "ayrılma" sövdələşməsi ilin sonuna qədər parlamentə təqdim ediləcək və Brexit 31 yanvar 2020-ci ilədək baş tutacaq.

Connson ölkəni Aİ-dən çıxara biləcək siyasi qüvvəyə rəhbərlik edən şəxs olduğunu deyir. Baş Nazir Leyboristlər Partiyasının Brexitdə ikinci referendum keçirmək niyyətində olduğunu, Şotlandiya Milli Partiyası və Liberal Demokratlar isə, 2016-cı il referendumunun nəticələrini ləğv ediləcəyini bəyan edir.

 

Beləliklə, müxalif qüvvələrin əksəriyyəti faktiki olaraq Aİ üzvlüyünün tərəfdarıdır. Yəni siyasi qüvvələrin, təxminən yarısı Aİ-də qalmağa, digər yarısı Brexitə üstünlük verir. İkinci bir referendum keçiriləcəyi təqdirdə, kimin qazanacağını proqnozlaşdırmaq isə çətindir.

 

Onu da qeyd etmək lazımdır ki, Liberal Demokratların lideri Co Svinson Brexiti tamamilə ləğv etməyi təklif edir. O, insanlara açıq və ardıcıl   olaraq Avropa İttifaqı üzvlüyünün qorunmasını dəstəkləyən partiyaya səs vermək imkanı verilməli olduğunu söyləyir.

 

Bununla yanaşı, “Reuters” agentliyinin məlumatına görə, bu ilin noyabr ayında Britaniya iqtisadiyyatı, 2016-cı ilin ortalarından bəri ən dərin tənəzzülünü yaşayıb. Çünki milli seçkilərin yaxınlaşması böhranı necə aradan qaldıracağına dair qeyri-müəyyənliyi daha da artırıb.

 

Etiraf etmək lazımdır ki, bütün çatışmazlıqlara baxmayaraq, bölgədə tarazlığı təmin edən iqtisadi və siyasi ziddiyyətləri aradan qaldırmağa imkan verən qüvvə Avropa İttifaqıdır. İngilislər Avropa bürokratiyası ilə kompromisə getməlidirlər.

 

Brexit hələ baş verməsə də, ingilislər artıq onun “bəhrəsini” hiss edirlər. Mediada yayılan məlumatlara görə, supermarketlərdə mal seçimi azalıb, qida və dərman vasitələrində mümkün fasilələr barədə şayiələr yayılır. Milli valyuta olan funtun dəyəri azalır, ÜDM dəyərdən düşür, işsizlik artır.

 

Bundan başqa, firmalar kütləvi şəkildə qərargahlarını başqa ölkələrə köçürür. İngiltərədə yaşamaq istəyən insanların sayı azalır. “The Guardian” qəzetinə görə, ölkədən mühacirətin nisbəti, keçən ildəki 8 mindən bu il 85 min nəfərə yüksəlib. Yerli əhali arasında da ölkəni tərk etməyə başlayanlar var. İrlandiya sərhədində isə belə plakatlar asılıb: "Brexit - İrlandiyanın birləşməsinə aparan yol".

 

Yəni Brexit nəticəsində vəd edilən faydalar görünmür, əksinə ciddi fəsadlar ortaya çıxır. Çünki bir çox müşahidəçilərin fikrincə, Aİ-dən ayrılma ideyası məhdud sayda qüvvənin maraqları naminə ortaya atılıb.

 

Baş verənlərin mahiyyətini məşhur müğənni Elton Con belə ifadə edib: "Lənət olsun, mən avropalıyam, lakin imperator deyiləm".

 

Bu gedişlə ingilislər yalnız özlərini və Avropanı zəiflədəcəklər. Bundan kim faydalanacaq?

Müəllif: Rauf Orucov      25 Noyabr 2019 21:30
Siyasət bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin