Qalmaqallı bəyanata şərh: “Lavrov erməni ictimaiyyətini razı salmaq istəyirdi”

Qalmaqallı bəyanata şərh: “Lavrov erməni ictimaiyyətini razı salmaq istəyirdi”

Rauf Mirqədirov: “Nə qədər ki, Dağlıq Qarabağ münaqişəsi həll olunmayıb, Ermənistan Rusiyanın təsir dairəsindən çıxa bilməyəcək”

 

Rusiyanın Xarici İşlər naziri Sergey Lavrov Ermənistan səfərində bildirib ki, “Dağlıq Qarabağ münaqişəsi üzrə danışıqlar prosesinin tərkibinin müəyyən edilməsini tərəflər özləri razılaşdırmalıdır, bu barədə mübahisə etmək isə çox çətindir”.

 

Rusiya XİN başçısı daha sonra deyib: “Hamıya aydındır ki, Dağlıq Qarabağ əhalisinin razılığı olmadan heç bir razılıq əldə etmək mümkün olmayacaq. Ermənistan tərəfi, sadəcə olaraq, bunu imzalamayacaq. Biz məhz bu mövqedən çıxış edirik. Ərazi bütövlüyü, öz müqəddəratını təyin etmək, istisnasız olaraq münaqişələrin sülh yolu ilə nizamlanması prinsipləri münaqişə tərəfləri arasında müzakirə olunan sənədlərdə öz əksini tapıb”.

 

Lavrovun bu bəyanatı Azərbaycan cəmiyyətində ciddi etirazlara və qızğın müzakirələrə səbəb olub. Əksəriyyət rəsmi Bakıdan dərhal və sərt addım atılmasını tələb edir.

 

AYNA əməkdaşı, mövzu ətrafında politoloq Rauf Mirqədirovla həmsöhbət olub.

- Rauf müəllim, Sergey Lavrov bizə və digər maraqlı tərəflərə nəyin mesajını verir?

 

- Lavrov bu bəyanatları Ermənistana səfəri zamanı, Yerevanda səsləndirib. Bununla yanaşı, o, Dağlıq Qarabağla bağlı başqa bəyanatlara da yer verib. Belə ki, Ermənsitanla Rusiya arasında son zamanlar bəzi anlaşılmaz hadisələr baş verib. Nikol Paşinyan hakimiyyətə gələndən sonra Rusiyanın, əsasən də Vladimir Putinin planlarına qarşı çıxdı. Moskva da çox yaxşı başa düşür ki, Paşinyan onları razı salmadığı müddətdə, Ermənistan tamamilə Rusiyanın təsir dairəsində qalmağa davam edəcək.

 

- Belə çıxır ki, Lavrovun bəyanatları erməniləri razı salmaq üçündür?

 

- Əlbəttə. Daha doğrusu, nə qədər ki, Dağlıq Qarabağ münaqişəsi həll olunmayıb və Ermənistan yaxın qonşuları ilə münasibətlərini bərpa etməyib, Rusiyanın təsir dairəsindən çıxa bilməyəcək. Çünki Ermənistanın təhlükəsizliyi birbaşa Rusiya tərəfindən təmin olunur. Ona görə də Lavrov Ermənistan səfərində erməni ictimaiyyətini razı salan mesajlar verdi.

 

- Bu bəyanat Moskvanın Dağlıq Qarabağa dair rəsmi mövqeyi kimi qəbul edilməlidir?

 

- Rusiya tərəfi dəfələrlə Dağlıq Qarabağla bağlı mövqeyini bəlli edib. “Münaqişə Dağlıq Qarabağ ermənilərinin razılığı ilə həll olunmalıdır” ifadəsi “Madrid prinsipləri”ndə də özünü göstərib. Belə ki, “Madrid prinsipləri”ndə deyilir ki, “Dağlıq Qarabağın yekun statusu əhalinin hüquqi qüvvəyə malik iradəsini ifadə etməklə həyata keçirilməlidir”. Bu baxımdan Lavrovun fikirlərində yeni nəsə yoxdur.

 

- Lavrovun fikirləri Dağlıq Qarabağ münaqişəsi üzrə danışıqlar prosesinə təsir göstərə bilər?

 

- Lavrov başqa bir bəyanatda bildirib ki, “münaqişənin həlli müharibə yolu ilə deyil, danışıqlar yolu ilə həll olunmalıdır”. “Madrid prinsipləri”ndə də deyildiyi kimi, “müharibə - güc tələb edir deyə, yolverilməzdir”. Belə olan halda da Rusiya ya Azərbaycana işğal olunmuş ərazilərini geri qaytarmağa imkan yaradacaq, ya da Ermənistan bu əraziləri könüllü olaraq, sülh yolu ilə Azərbaycana geri qaytaracaq. Lavrov da bu bəyanatlarda, sadəcə olaraq Rusiyanın Cənubi Qafqaz siyasətinin dəyişmədiyini bəyan edib.

 

- Bəs Azərbaycan belə məqamda nə etməlidir?

 

- Azərbaycan belə məqamda heç nə edə bilməz. Sadəcə Xarici İşlər Nazirliyinin xətti ilə öz etirazlarını bildirəcək. Burdan da belə nəticə çıxır ki, gerçəkləri anlamaq və reallıq üzərində xarici siyasət qurmaq lazımdır. Yəni reallığa əsaslanmayan ümidlər üzərində xarici siyasət qurmaq olmaz. Ümidlər üzərində qurulan siyasətlə də Qarabağı azad etmək mümkün deyil.

Müəllif: Mərahim Nəsib      12 Noyabr 2019 19:25
Siyasət bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin