Məzunları həvəsləndirirlər ki, filan universitetdə “şirinlik” keçir – QARŞIDA TƏLƏ VAR

Məzunları həvəsləndirirlər ki, filan universitetdə “şirinlik” keçir –               QARŞIDA TƏLƏ VAR

Ekspert: “Xaricdə təhsil şirkətinə müraciət edərkən bir neçə nüansa ciddi diqqət yetirilməlidir”

 

Uzun illərdir ölkəmizdə xaricdə təhsilə imkan yaradan şirkətlər fəaliyyət göstərir. Həmin şirkətlər yüzlərlə tələbənin xaricdə təhsil almasına vasitəçi olsa da, bu şirkətlərdən bəziləri dələduzluq hadisələri ilə gündəmə gəlir. Hətta müxtəlif yalanlarla insanları aldadan bəzi saxtakar şirkət rəhbərləri, külli miqdarda pul mənimsədikdən sonra ölkədən qaçırlar.

 

Məsələni AYNA-ya şərh edən xaricdə təhsil üzrə ekspert Fuad Hacıyevin sözlərinə görə, bu kimi şirkətlər mövsümi olaraq ortaya çıxır, bir müddət bazarda fəaliyyət göstərir, sonra yoxa çıxır: “Onlar üçün brend kimi formalaşmağın, şirkət imicinin heç bir əhəmiyyəti olmur”.

“Xaricdə təhsil şirkətinə müraciət edərkən diqqət etməli olduğumuz bir neçə nüans var. Belə ki, ilk növbədə şirkətin nə qədər müddətdir fəaliyyət göstərdiyi ilə maraqlanmaq vacibdir. Daha sonra şirkətin təqdim etdiyi xidmətlər mütləq şəkildə bazardakı başqa şirkətlərin xidmətləri ilə müqayisə edilməlidir. Hər hansı xidməti satın aldıqda, şirkətin məsul şəxsinin imzası və möhürü ilə təsdiqlənmiş müqavilə və xidmət müqabilində ödənilən məbləğin qəbzi tələb olunmalıdır. Bu kimi hallara diqqət yetirildiyi təqdirdə, vətəndaşlarımız daha az mənfi hallarla üzləşərlər” – deyə Hacıyev bildirib.

 

Ekspert qeyd edib ki, artıq gənclər Qərb ölkələrinin universitetlərinə daha çox maraq göstərirlər: “Bunun da əsas səbəbi Azərbaycan Respublikası Gənclər Fondunun xaricdə təhsil üzrə təqaüd proqramıdır. Xarici universitetlərdən qəbul alan gənclər təhsil haqlarının ödənilməsi üçün bu proqram daxilində Gənclər Fonduna müraciət edirlər”.

 

Müsahibimiz hazırda Ukrayna universitetlərinə marağın azaldığını da diqqətə çatdırıb: “Bu, sevindirici haldır. Çünki bu ölkədəki bir çox universitetlər keyfiyyətli təhsil vermək üçün yox, sadəcə pul qazanmaq üçün xarici ölkələrdən tələbə qəbul edir. Hətta, siz universitetdəki bir çox problemlərinizi - dərsə davamiyyət problemini, imtahanda keçid balını toplaya bilməmək problemini “şirinliklə” həll edə bilərsiniz. Məsələ burasındadır ki, gəncləri Ukraynada təhsil almaq üçün yönləndirən bir sıra xaricdə təhsil şirkətləri uşaqları həmin “rahat yollar” barədə məlumatlandırmaqla daha da həvəsləndirirlər”.

Müəllif: İbrahim Məmmədli      3 İyul 2019 10:06
Cəmiyyət bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin