Hakimiyyət üçün prioritet hansıdır: Polis, yoxsa təhsil?

Hakimiyyət üçün prioritet hansıdır:           Polis, yoxsa təhsil?

Məhkəmə hakimiyyəti, hüquq-mühafizə və prokurorluq orqanlarının saxlanılması xərcləri 1 milyard 973 milyon 67 min 124 manat təşkil edəcək

 

Hüquq mühafizə orqanlarının saxlanması xərci 43,7 faiz artırılır. Növbəti ilin büdcəsində kəskin artıma məruz qalan xərc maddələrindən biri də məhkəmə hakimiyyəti, hüquq-mühafizə və prokurorluq orqanlarının saxlanılması xərcləridir.

 

AYNA xəbər verir ki, bu barədə iqtisadçı-alim Qubad İbadoğlu paylaşıb edib. Onun sözlərinə görə, gələn il üçün nəzərdə tutulan bu xərc maddəsi ötən illə müqayisədə, bütövlükdə 655 milyon 331 min 737 manat və ya 49,7 faiz artacaq.

“Bu artımın 448 milyon 726 min 224 manatı və ya 68,5 faizi hüquq mühafizə orqanlarının payına düşəcək. Müqayisə olunan dövrdə hüquq mühafizə orqanlarının saxlanması xərci də 448 milyon 726 min 224 manat və ya 43,7 faiz artacaq”, - ekspert bildirib.

 

“Növbəti il üçün məhkəmə hakimiyyəti, hüquq-mühafizə və prokurorluq orqanlarının saxlanılması xərcləri 1 milyard 973 milyon 67 min 124 manat təşkil edəcək ki, bu, həmin il üçün nəzərdə tutulan ümumtəhsil xərclərindən 267 milyon 714 min 321 manat çoxdur. Özünüz nəticə çıxarın, hakimiyyət üçün prioritet hansıdır?”, - deyə İbadoğlu əlavə edib.

 

Mövzu ilə bağlı AYNA-ya açıqlama verən Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Aydın Mirzəzadə deyib ki, hakimiyyət üçün bütün sahələr prioritetdir: “Hər hansı bir sahəyə diqqət yetirilməsə, həmin sahə inkişafdan qalsa, şübhəsiz ki, müəyyən dövrlərdən sonra bu, digər sahələrə də öz təsirini göstərəcək. Hüquq mühafizə orqanlarının saxlanılmasına əhəmiyyətli dərəcədə vəsaitin ayrılması ondan irəli gəlir ki, o sahəyə ayrılan xərclər uzun müddət stabil saxlanılıb. Amma əhalinin, şəhər və qəsəbələrin sayı artıb, məhkəmələrin gördüyü işlərin sayı artıb. Azərbaycanda məhkəmə sisteminin bir ayda gördüyü iş Avropa ölkələrinin göstəricilərindən qat-qat yüksəkdir”.

“Digər tərəfdən, hüquq mühafizə orqanlarında işçilərin sayının artmasına da ehtiyac var. Bu isə əhalinin artımı, əhaliyə yaxın olma, maddi-texniki bazalara ehtiyac duymaq və əməkhaqlarının artması ehtiyacı ilə bağlıdır. Hüquq mühafizə orqanlarında işləmək çətin və məsuliyyətlidir. Eyni zamanda, onların fəaliyyət göstəməsi üçün texnikanın alınması, binaların tikilməsi, təmiri yüksək vəsait tələb edir. Ona görə də o sahəyə vəsait artımını mən tamamilə məqbul və düzgün hesab edirəm”, - deputat bildirib.

 

Onun sözlərinə görə, ölkədə cinayətlərin sayı azalıb: “Nəzərə alaq ki, ölkədə əhali sayı durmadan artır. Cinayətlərin isə strukturu dəyişib. Mütəşəkkil cinayətlərin və qətl hadisələrin sayı ksəkin şəkildə azalıb. Xırda cinayətlər zəmnində olan bəzi cinayətlərdə isə artım ola bilər. Bunun da qarşısını almaq üçün profilaktik tədbirlər görülməlidir. Bir sahə müvəkkilinə müəyyən sayda insan düşəndə, şübhəsiz ki, o, vaxtında tədbir görə bilməyəcək. Amma sahə müvəkkilərinin sayı artırıldıqda, onlar daha az sayda vətəndaşlarla təmasda olacaq və işin keyfiyyəti də artacaq”.

 

“Amma mən təhsil və hüquq mühafizə sahələrini üz-üzə qoymağın tərəfdarı deyiləm. Çünki təhsilə və sosial sahəyə vəsait ildən-ilə artır. Hüquq mühafizə orqanlarının saxlanılmasına isə vəsait yalnız bu il artıb. Son 16 il ərzində Azərbaycanda mövcud olan 5000 məktəbin 3600-ü yenidən təmir edilib ki, bu, təhsilə olan qayğıdan irəli gəlir. 600 xəstəxana təmir edilib ki, bu da səhiyyə sahəsinə olan diqqətdir. Gələn il dövlət universitetlərində dövlət hesabına təhsil alan tələbələrin sayı da artılacaq. Hesab edirəm ki, bu sahələrə dövlət kifayət qədər dəstəyini göstərib. Bunun da nəticəsini biz əhalinin ali təhsilə marağında, ildən-ilə qəbulda yüksək göstəricilərin olmasında, eyni zamanda əhalinin təhsil və mədəni səviyyəsinin artmasında görə bilərik”, - deyə A.Mirzəzadə vurğulayıb.

Müəllif: Mərahim Nəsib      6 Noyabr 2019 19:01
Cəmiyyət bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin