Həyəcan siqnalı: Nə karvan keçəcək, nə saray qalacaq - FOTOLAR

Həyəcan siqnalı: Nə karvan keçəcək, nə saray qalacaq -         FOTOLAR

Avropa Oyunlarına imkanımız çatır, Formula-ya pulumuz yetir, amma mədəni irsimizə...

 

Qaradağ rayonunun Səngəçal qəsəbəsində yerləşən tarixi karvansaray məhv olmaq təhlükəsi ilə üz-üzədir. 1439-1440-cı illərdə Şirvanşahlar dövləti tərəfindən əsası qoyulan karvansaray, 700 il öz varlığını qoruyub saxlasa da, bu gün təmir-bərpa işlərinə böyük ehtiyac duyur.

Problemlə əlaqədar həyəcan təbili çalan Elçin Əliyev adlı “Facebook” istifadəçisi, tarixi-mədəni abidənin fotolarını da paylaşıb və “Səfəvilər dövründə mövcud olan, Osmanlı və Rusiya imperiyaları zamanında dözüm göstərən, Sovet hakimiyyəti vaxtında dağılmayan karvansaray, qəribədir ki, müstəqillik əldə olunandan sonra bərbad vəziyyətə düşüb”, – deyə yazıb.

Qeyd edək ki, artıq neçə illərdir, Azərbaycan müxtəlif beynəlxalq idman yarışlarına ev sahibliyi edir və bunun üçün külli miqdarda vəsait xərclənir. Olsun, nə deyirik...

 

Bəs mədəniyyətimiz, tariximiz? Onların qayğısına qalmaq üçün pulumuz yoxdur, yoxsa həvəsimiz? Üstəlik, həmin tarixi abidələr, onlara göstərilən nəvazişi qarşılıqsız qoymur – bir az vəsait xərcləyib təmir-bərpa etməklə nə qədər turist cəlb edə biləcəyimiz də ağlımıza gəlmir?

Məsələ ilə bağlı Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin mətbuat katibi Fariz Hüseynov AYNA-ya bildirib ki, sözegedən abidə dövlət tərəfindən qorunur: “Azərbaycan ərazisində 6 mindən çox abidə var. Əkəsriyyəti də təmir-bərpa işlərinə ehtiyac duyur. Həmin ərazidə isə 2 karvansaray yerləşir. Birinin vəziyyəti normal olsa da, digəri dağıntılara məruz qalıb. Lakin gələcək illər üçün abidə investisiya planlarına daxil edilib və 2020-2023-cü illərdə təmir-bərba işləri nəzərdə tutulub”.

“Təmir-bərpa işləri tez və ya gec ola bilər. Hal-hazırda dəqiq bir söz deyə bilmərəm. Sözügedən abidə Nazirliyin nəzdində bərpa olunması ən vacib abidələr siyahısına əlavə edilib”, - deyə Hüseynov bildirib.

“Əslində Səngəçal ərazisində yerləşən abidə elə də pis vəziyyətdə deyil. Qaradağ rayonu ərazisində yerləşən daş karxanalarının yanında bir karvansaray da var ki, təmirə daha çox o abidə ehtiyac duyur. Həmin abidələr keçən ildən etibarən dağıntılara daha çox məruz qalmağa başladı. Lakin abidələrin kifayət qədər çox olması və əksəriyyətinin də təmir-bərpa işlərinə ehtiyac duyması böyük çətinliklər yaradır. Nazirlik isə 5-6 abidəni ancaq bərpa etdirə bilir. Lakin böyük vəsait ayrılsa, abidələrin, demək olar ki, hər biri təmir oluna bilər”, - Nazirlik rəsmisi əlavə edib.

Müəllif: Mərahim Nəsib      4 Noyabr 2019 16:14
Mədəniyyət bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin