Millət vəkili: “Bir anlıq istefa vermək istədim”

Millət vəkili: “Bir anlıq istefa vermək istədim”

Məlahət İbrahimqızı: “Orta və yaşlı nəsil məmurlar sosial şəbəkələrdən istifadə etməyi bacarmırlar”

 

Xəbər veriyimiz kimi, Prezident İlham Əliyev Baş Nazirin iki müavinini, öz istəkləri ilə vəzifədən azad edib. Dövlət başçısı həmin məmurları istefaları ilə əlaqədar qəbul edərkən bildirib ki, iqtidar komandasında təmsil olunan digər məmurlar da bundan örnək götürməlidirlər.

 

AYNA əməkdaşı yaşananlarla bağlı millət vəkili Məlahət İbrahimqızı ilə həmsöhbət olub:

- Məlahət xanım, Prezident “bu, digər yoldaşlara yaxşı bir örnək olacaq” açıqlaması ilə hansı mesajları verirdi?

 

- Prezident ölkənin rəhbəridir. O, xalqın arzusunu və niyyətini ifadə edir. Bundan əlavə, Prezident yüksək idarəçilik mədəniyyəti və təcrübəsinə malikdir. Azərbaycan isə demokratik inkişaf yolu ilə addımlayan bir ölkədir. Dünyada demokratik inkişaf yolu ilə gedən ölkələrdə də məmurlar, yaxud siyasətçilər hər hansı bir məsələ ilə bağlı istefa verirlər. Bu baxımdan, Azərbaycanda da istefa mədəniyyəti öz təsdiqini tapmalıdır. Çünki Azərbaycan demokratik prinsiplərlər bərqərar olunan ölkədir. Ona görə də, Prezident məmurlara, eləcə də siyasətçilərə istefa vermək mədəniyyətinin mesajlarını verməyə çalışırdı.

 

- Sizin fikrinizcə, dövlət başçısı kimləri nəzərdə tuturdu?

 

- Azərbaycanda belə bir misal var: “qızım, sənə deyirəm, gəlinim, sən eşit” (gülür – müəllif) Prezident məmurlara bir-bir çağırış edib “istefa verin” deməli deyil. Dövlət idarəçiliyində gənclərə şərait yaradılmalı və gəncləşmə siyasəti həyata keçirilməlidir. Çünki idarəçilikdə yeni vizyona, təfəkkürə malik olan çevik kadrların bacarıqlarından istifadə olunmalıdır.

- Məsələn, məmur hansı kriteriyalara cavab verməlidir?

 

- Bizdə orta və yaşlı nəsil, demək olar ki, sosial şəbəkələrdən istifadə etməyi bacarmır. Amma dünya bu gün bunun üzərində qurulub. Məsələn, ABŞ Prezidenti Donald Tramp istənilən vaxt “Twitter” hesabında qalmqallı paylaşım edir və bütün dünyanın gündəmi dərhal dəyişir. Çünki sosial şəbəkələr dünya içində bir dünyadır. Ona görə də elə kadrlar olmalıdır ki, qloballaşan dünyanın şərtlərindən geri qalmasınlar. Prezident İlham Əliyev də müasir dünyanın liderlərdə tələb etdiyi xüsusiyyətlərə malik insandır. Təbii ki, onun komandasında, onun səviyyəsində olmasa da, onun tələb etdiyi kriteriyalara cavab verən kadrlar olmalıdır.

 

- Necə hesab edirsiniz, iqtidarda təmsil olunan yaşlı məmurlar Prezidentin çağırışana adekvat cavab verəcəklər?

 

- Təxminən 10-15 il bundan əvvəl Prezident regionların sosial-iqtisadi inkişafı ilə bağlı təşkil olunmuş layihələrin açılış mərasimlərində məmurlara irad tutmuşdu. Hətta, bir müddət icra hakimiyyəti başçıları və müavinlərini xarici səfərlərə göndərmişdi ki, dünya təcrübəsi qazansınlar və görsünlər ki, inkişaf etmiş ölkələrin merləri necə fəaliyyət göstərirlər. Bu baxımdan düşünürəm ki, ölkə başçısının çağırışına məmnuniyyətlə əməl olunmalıdır. İctimaiyyət də Prezidentin apardığı islahatları dəstəkləyir və eləcə də uzun müdətdir, bir vəzifədə çalışan və yaşı təqaüd yaşından xeyli keçmiş məmurların istefası da ictimaiyyət tərəfindən yüksək dəyərləndirilir və alqışlanır.

 

- Ölkə başçısı, hansı səbəbdən çağırış etmək əvəzinə, məmurları şəxsən özü istefaya göndərmək yolunu seçmir?

 

- Bu gün Azərbaycanda siyasətin bəzi etiketləri, elementləri və atributları tətbiq olunmur. Hətta bunun üçün xüsusi qanun və sərəncamlara da ehtiyac yoxdur. Çünki istefa mədəniyyəti, demokratik dəyərlərin tələblərindən irəli gələn normadır. Prezident yüksək mədəniyyətə malik olduğu üçün Hacıbala Abutalıbov və Əli Həsənovu yüksək mədəniyyətlə qarşıladı və xidmətlərinə görə təşəkkür etdi. Hətta o qəbulun xətrinə mən də bir anlıq istefa vermək istədim (gülür – müəllif) Bu tələblər demokratik və inkişaf etmiş bütün ölklərdə olmalıdır.

Müəllif: Mərahim Nəsib      23 Oktyabr 2019 14:05
Siyasət bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin