Mexanizm işə düşür: Yeni cərimələrdən sığortalanın

Mexanizm işə düşür: Yeni cərimələrdən sığortalanın

“Bu sığorta növü vacibdir, amma ilk növbədə sənədləşmə məsələsi həllini tapmalıdır”

 

Əslində, bu məsələ 2011-ci ildə qəbul olunan “İcbari sığortalar haqqında” qanunda əksini tapmışdı. Amma əvvəlcə hüquqi şəxslərin, daha sonra fiziki şəxslərin daşınmaz əmlakına şamil edildi.

 

Yeni ildən bu məsələ ciddiyətini qoruyacaq, hətta sığortaya tabe olmayanlar, qanuna müvafiq olaraq 30 manat məbləğində cərimə ödəyəcəklər. Vətəndaş canını bu məbləğlə də qurtarmayacaq, cərimə olunduqdan sonra 20 gün ərzində evini sığortalamayan şəxs təkrar 30 manat ödəməli olacaq.

Sığorta agenti Şahin İsmayılov AYNA-ya deyib ki, sığortanın bu növünün tətbiqi genişlənməlidir: “İndiyə qədər bu sığorta növü ancaq ev alqı-satqı proseslərində sayılırdı, indi isə bütü evlərə şamil olunacaq. İnsanların müraciətləri ilə tanış olduqda aydın olur ki, çox adam bu sığortanın mahiyyətini anlamır. Bir qismi isə alqışlayır, çünki fərdi yaşayış evinin sığortası vətəndaşı rahat edir, işdir, nəsə baş versə, dəymiş zərər ödənilir”.

 

“Hər kəs bilməlidir ki, bütün qeydiyyatda olan mənzillərin məlumatları İcbari Sığorta Bürosunun bazasına inteqrasiya edilib. Yəni əmlaka sığorta yazmaq üçün evin “kupça”sının nömrəsini və mənzil sahibinin şəxsiyyət vəsiqəsi məlumatlarını sistemə vurmaq bəs edir ki, bütün məlumatlar üzə çıxsın. Cərimə yazmaq üçün qapı-qapı düşüb, sığorta var ya yox yoxlamağa ehtiyac yoxdur”, - mütəxəssis bildirib.

 

Əmlak eksperti Ramil Qasımzadə də AYNA əməkdaşı ilə söhbətində, bu sığorta növünün vacibliyindən danışıb: “Fövqəladə hallarda, həmçinin qonşular arasındakı məhkəmə çəkişmələrində icbari sığorta köməyə gələ bilər. Lakin ilk növbədə sənədləşmə məsələsi həllini tapmalıdır, axı. Bakı və şəhərətrafı ərazilərdə sənədsiz evlər çoxdur. O zaman avtomobillərlə bağlı icbari sığorta məsələsi gündəmə gələndə, əvvəl proses çətin gəlirdi, amma hazırda bu sığortanın xeyrini hamı görür. Düşünürəm ki, daşınmaz əmlak sığortası da zamanla həllini tapacaq”.

 

Ekspert vurğulayıb ki, vətəndaş sığorta şirkətlərini seçməkdə azaddır: “Bu da sığorta şirkətləri arasında rəqabət yaradacaq və bu, göstərilən xidmətin qiymətinə də təsir edəcək”.

 

İpoteka şərtləri ilə alınan evlərə gəlincə, Ramil Qasımzadə deyib ki, bu kateqoriyada olan evlərdən onsuz da alqı-satqı zamanı sığorta müqaviləsi tələb olunur: “Onların da vahid məlumat bazası olmasının şərtdir”.

 

Müsahibimizin sözlərinə görə, fərdi yaşayış evlərinin icbari sığortasında əsas və mübahisəli məqamlardan biri həmin evlərin qiymətləndirilməsidir: “Hazırda sığorta şirkətlərinin müştərilərlə ən çox problem yaşadıqları vəziyyət budur. Yaxşı olardı ki, əmlakın qiymətləndirməsinə müstəqil ekspertlər də cəlb olunsun”.

 

Diqqətə çatdırırıq ki, fərdi yaşayış evlərinin icbari sığortası ilə bağlı hesabat və statistika İcbari Sığorta Bürosunun (İSB) rəsmi internet səhifəsində olmalıdır. Təəssüf ki, qurumun rəsmi səhifəsində əsas və vacib informasiya ilə bağlı statistikalar 2017-ci illə bitir.

 

Bəs 2020-ci ilin astanasında olduğumuz bir müddətdə Büro, təxminən 2 illik məlumatlarını niyə gizlədir? İSB-nin İctimaiyyətlə əlaqələr şöbəsindən Nərmin Rəhimova AYNA-nın bu sualına belə cavab verib: “Tezliklə məlumatları rəsmi səhifədə görə biləcəksiniz”.

Müəllif: Raminə Eyvazqızı      22 Oktyabr 2019 10:23
Cəmiyyət bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin