Mənasız suallar verən canlı aparıcıdan Dadaşlinski yaxşıdır

Mənasız suallar verən canlı aparıcıdan Dadaşlinski yaxşıdır

İTV-nin 3D verilişinin formatı önəmlidir, yoxsa robotun suallarının mahiyyəti?

 

Bəzi millət vəkilləri, tanınmışlar İTV-nin 3D layihəsinə çıxmaqdan imtina ediblər. Düşünürəm ki, bu, doğru bir yanaşma deyil. İTV dövlət büdcəsindən maliyyələşən media qurumudur, bu qurumun fəaliyyəti üçün vəsaitin ayrılmasına elə deputatlar səs veriblər. Sadəcə, elə bu baxımdan onların bu addımı məntiqli görünmür.

 

Eyni zamanda deputatlar, dövlət məmurları, ictimai yük daşıyan şəxslər də onlara ünvanlanan sualları cavablamağa borcludurlar. Sualın hansı formatda verilməsi deyil, mahiyyətcə necə olması daha önəmlidir. Əgər sualda qanunvericiliklə müəyyən olunan qadağalar, etikadan kənar ifadələr, təhqir və böhtan yoxdursa,  o zaman fikrimcə, bu cür ictimai yük daşıyan şəxslərin imtinası doğru yanaşma deyil.

İTV - dövlət büdcəsindən maliyyələşən media qurumu Azərbaycan reallıqlarını nəzərə alaraq animasiya formatında, anonim formatda suallar ünvanlayırsa, düşünürəm ki, adıçəkilən ictimai şəxslər daha çox 3D-nin formatına yox, sualın mahiyyətinə diqqət yetirməlidirlər. Fikrimcə, hansısa yeknəsək, mənasız və şablon suallar verən canlı aparıcıdansa, elə 3D, Dadaşlinski indiki məqamda daha uğurlu hesab oluna bilər.

 

Cəmiyyət üçün bu sualların hansı formatda verilməsi deyil, daha çox hansı mahiyyətdə verilməsi əhəmiyyət kəsb edir. Cəmiyyət bu sualların 3D, yaxud Dadaşlinski tərəfindən deyil, elə publik qurum olan İTV tərəfindən verildiyinin fərqindədir.

 

Odur ki, düşünürəm, deputatlarımızın İTV-nin fəaliyyətinin daha da canlandırılmasına, plüralizmin inkişafına, aktual mövzular ətrafında maraqlı tərəflərin iştirakı ilə canlı diskussiyaların təşkilinə yönəlik təkliflər vermələri daha doğru yanaşma olardı. Ümid edirəm, hörmətli deputatlarımız və məmurlarımız bunu nəzərə alacaqlar.

 

Osman Gündüz,

Milli İnternet Forumunun prezidenti

 

Redaksiyadan qeyd: Milli Məclisin üzvləri Fəzail Ağamalı və Ağacan Abıyev İctimai Televiziyada (İTV) yayımlanan və aparıcısı robot olan "3D" verilişinə qatılmaqdan imtina ediblər. Onlar bu addımlarını “kukla ilə üz-üzə oturmaq istəmirik” şəklində izah ediblər.

Müəllif: Ayna.az      4 Oktyabr 2019 11:59
Cəmiyyət bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin