Azərbaycan elminin Günəşi və onun peykləri

Azərbaycan elminin Günəşi və onun peykləri

Həyatda nəyə nail olmuşamsa, bunda Azad müəllimin olduqca böyük rolu və zəhməti var

 

Bu gün əziz müəllimim, elmi rəhbərim Azad Mirzəcanzadənin (29.09.1928 - 17.06.2006) doğulduğu gündür. Görkəmli alim, akademik A.Mirzəcanzadə atam - elmlər doktoru, professor Nəbi Yaqubovun da elmi rəhbəri olub. Atam Azərbaycan Dövlət Universitetinin (indiki BDU) tələbəsi ikən, Azad Mirzəcanzadə universitetin Nəzəri mexanika kafedrasının dosenti idi.

 

Elə o vaxt başlayan müəllim-tələbə münasibətləri daha sonra müəllim-aspirant münasibətlərinə keçib. Atam əvvəlcə Azad müəllimin elmi rəhbərliyi altında namizədlik, ardınca da doktorluq dissertasiyası müdafiə edərək uzun illər bərabər bir institutda - o vaxtkı adı ilə Azərbaycan Neft və Kimya İnstitutunda çalışdılar.

Tale elə gətirdi ki, mən də Azad müəllimin aspirantı oldum, onun rəhbərliyi altında namizədlik dissertasiyası müdafiə etdim. Aspirantura illərindən tanıdığım, uzun müddət birgə çalışdığım professor, akademiyanın müxbir üzvü Telman (Tulparxan) Salavatov keçən il məni məzunu olduğum doğma instituta dəvət etmiş, Azad Mirzəcanzadənin adını daşıyan auditoriyanı gəzdirmiş, orada açılmış xatirə dəftərinə ürək sözlərimi yazmağımı istəmişdi.

Telman müəllim bu gün həm də biziim kafedranın müdiridir. Kafedrada divardan "Azad Mirzəcanzadə Planetariyumu" adlı bir lövhə asılıb. Ortada Azad müəllimin şəkli, ətrafında isə əlifba sırası ilə onun tələbələrinin adları düzülüb. Hazırlayanlar Azad müəllimi Günəş kimi ortada verib, bizi isə onun ətrafına yerləşdiriblər. Orada atamla mənim adımın yan-yana olduğunu görəndə xeyli duyğulanmış və böyük qürur hissi keçirmişdim.

 

Həyatda nəyə nail olmuşamsa, bunda Azad müəllimin olduqca böyük rolu və zəhməti var. İndi Bakıdan uzaqda əziz müəllimimi sevgilə anır, onun əziz ruhu qarşısında hörmətlə baş əyirəm.

Müəllif: İbrahim Nəbioğlu      29 Sentyabr 2019 15:57
Cəmiyyət bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin