Əsas səhifə Haqqımızda Xəbər lenti

Videotəqdimat müsabiqəsinə başlanılıb

Videotəqdimat müsabiqəsinə başlanılıb

“Ən yaxşı videotəqdimat” müsabiqəsi təhsil müəssisələrinin dərnək rəhbərləri arasında keçirilir

 

Bakı Şəhəri üzrə Təhsil İdarəsi (BŞTİ) tərəfindən “Ən yaxşı videotəqdimat” müsabiqəsinə start verilib. BŞTİ-dən AYNA-ya bildirilib ki, Nizami Gəncəvinin 880 illik yubileyinə həsr olunmuş “Ən yaxşı videotəqdimat” müsabiqəsi təhsil müəssisələrinin dərnək rəhbərləri arasında keçirilir. Müsabiqə dahi Azərbaycan şairi və mütəfəkkiri Nizami Gəncəvinin 880 illik yubileyinin qeyd edilməsi, Nizami sənətinin öyrənilməsi və tanıdılması, eyni zamanda, dərnək rəhbərləri ilə aparılan işlərin daha da gücləndirilməsi, tədrisə müasir yanaşmaların təbliğ olunması, bacarıqlı, mütərəqqi fikir və düşüncəli dərnək rəhbərlərinin üzə çıxarılması məqsədilə təşkil edilir.

 

Müsabiqə iştirakçıları təqdimatla çıxış edəcək. Çıxışlar 2021-ci il mayın 20-dək videoformatında BŞTİ-nin [email protected] elektron poçt ünvanına göndərilməlidir.

 

Müsabiqənin əsas mövzuları “Nizami Gəncəvi yaradıcılığına çəkilmiş illüstrasiyalar”, “Nizami poeziyasının çoxşaxəliliyi”, “Azərbaycan təbiətinin Nizami Gəncəvi yaradıcılığında yeri”, “Nizami yaradıcılığının musiqi ilə inteqrasiyası”, “Nizaminin elmi və astronomik düşüncələrinin bugünkü elm tərəfindən sübutu”ndan ibarətdir.

 

Qiymətləndirilmə zamanı təqdimatın mövzuya uyğunluğu, nəzəri əsasların olması, ümumi yanaşma, məlumatın toplanması və təhlili, əldə edilmiş nəticənin aydın və səlis təqdim olunması, təqdimatın mövcud elmi biliklərin və təcrübənin inkişafına töhfəsi əsas meyarlar kimi götürüləcək.

 

Müsabiqənin yekununda ümumilikdə 6 iştirakçı (1 nəfər-I yer, 2 nəfər-II yer, 3 nəfər-III yer) qalib seçiləcək. Qaliblərə BŞTİ tərəfindən diplom və hədiyyələr təqdim ediləcək. On nəfər isə fəal iştirakına görə tərifnamə ilə təltif olunacaq.

Müəllif: Ayna.az      7 May 2021 17:58
Xəbərlər bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin