İctimai qəzəbə tuş gəlmiş aktyor “bədbəxt” kəlməsinə aydınlıq gətirdi

İctimai qəzəbə tuş gəlmiş aktyor “bədbəxt” kəlməsinə aydınlıq gətirdi

Qorxmaz Əlilicanzadə: “Gürcüstanda yaşayan həmvətənlərimiz saytların bu yanlış informasiyasına inanaraq mənə qəzəbləniblər”

 

Aktyor, şoumen Qorxmaz Əlilicanzadənin ARB TV-də qatıldığı proqram zamanı işlətdiyi fikirlər yerli xəbər portallarında tirajlanıb və cəmiyyətin qınağına səbəb olub. Veriliş zamanı ixtira etdiyi yeni musiqi alətləri haqqında danışan Qorxmaz Əlilicanzadə “Gürcüstanda... Bədbəxt nəyə görə deyirəm? Onların bir xalq çalğı alətləri yoxdur” deyib.

 

Xəbər başlıqlarında aktyorun “Gürcüstanlılar bədbəxtdir” deməsi qeyd olunub və bu fikir Gürcüstanda yaşayan azərbaycanlıların qəzəbinə tuş gəlib.

 

AYNA məsələ ilə bağlı Qorxmaz Əlilicanzadə ilə əlaqə saxlayıb. Aktyor deyib ki, onun fikirləri tamamilə yanlış anlaşılıb və təhrif olunub.

“Mən ARB kanalında “Səhər-səhər” verilişində çıxışımda demişəm ki, Azərbaycan xalqı xoşbəxt xalqdır, çünki özünün musiqi alətləri var. Demişəm ki, yeni ansamblla bu alətlərimizi yaşatmışıq, inkişaf etdirmişik. Məsələn, Gürcüstanda arxivlərdə olmuşam və görmüşəm ki, gürcülərin üç-dörd aləti var, ansamblları isə yoxdur. Gürcülər bədbəxt xalqdır ki, öz milli alətlərini yaşada bilməyiblər” – aktyor bildirib.

 

“Götürüb səhvən yazırlar ki, guya mən gürcüstanlıların bədbəxt olduğunu demişəm. Gürcüstanda yaşayan həmvətənlərimiz də saytların bu yanlış informasiyasına inanaraq mənə qəzəbləniblər. Amma mən məəttəl qaldım. Məgər mən deyəndə ki, “azərbaycanlılar xoşbəxtdirlər ki, özlərinin milli musiqi alətləri var”, bu Gürcüstandakı azərbaycanlılara aid deyil?” – o vurğulayıb.

 

Əlilicanzadənin sözlərinə görə, bizim səhvimiz odur ki, biz gürcüstanlı dedikdə, məhz orada yaşayan azərbaycanlıları nəzərdə tuturuq: “Gürcüstanlı və gürcü bunlar fərqli anlamlardır. Gürcü millət adıdır, gürcüstanlı orda yaşayan bütün millətlərə aid sözdür. Orada abxazlar var, acarlar var, asetinlər var, ləzgilər var, üzdəniraq haylar var ki, özlərini erməni adlandırırlar və s. Bunların hamısı gürcüstanlı sayılır. Əgər mən “gürcüstanlılar bədbəxtdir” demiş olsaydım belə (hərçənd, deməmişəm), bu, azərbaycanlılar demək deyil. Azərbaycanda türklərlə birgə talış, ləzgi, avar qardaşlarımız yaşayır. Onlar hamısı azərbaycanlıdırlar”.

 

“Məni təhqir edənlər bir az savadlarını artırsınlar və ayırd etsinlər ki, gürcü kimdir, gürcüstanlı kimdir. Biz, görün necə ayrı-seçkilik yaratmışıq ki, Qərbi Azərbaycandan olan həmvətənlərimizə ermənistanlılar deyirik. Cənubi Azərbaycandan olan həmvətənlərimizə iranlılar deyirik. Gürcüstanda yaşayan azərbaycanlılara da gürcüstanlılar deyirik. İran azərbaycanlısı, Gürcüstan azərbaycanlısı deməliyik. Mən əgər demiş olsam ki, rusiyalılar alçaq adamdır, bu, o deməkdir ki, mən Dərbənddə yaşayan həmvətənlərimizi də nəzərdə tuturam? Lap tutalım ki, mən hansısa səhvi buraxmış olsam, bunu mənə zəng edərlər, dəqiqləşdirərlər, izahını istəyərlər, sonra yayımlayarlar da. Bəlkə mən beşini də üstünə qoyub deyəcəm, onda ver efirə, əlində əsas olsun. Yoxsa öz yanlış anlamağın bəs deyilmiş kimi, mənim adımdan da yalan yazırsan”.

 

Müsahibimiz fikrini belə yekunlaşdırıb: “Yenə sağ olsun, zəng elədim, jurnalistlərdən biri xəbərə düzəliş etdi. Hərçənd ki, səhv etdiklərini yazıb məndən üzr istəməli idilər. Ədəbimdən “sağ ol” deyirəm, amma mənim 24 saat boyunca nahaq yerə abrım getdi. Əsas odur ki, Allahımın yanında düzəm. Amma qohumun, dost-tanışın yanında gərək hər dəfə gedib izah edəm ki, belə deyil, belədir, saytlar yalan yazıb və s. Jurnalistlərin öz peşə etikalarına riayət etmələrini istəyirəm. Reytinq naminə xalqın sənətini, sənətkarını ləkələmək vətənə də, millətə də xəyanətdir».

Müəllif: Orxan Bahadırsoy      21 İyun 2019 22:01
Mədəniyyət bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin