Əsas səhifə Haqqımızda Xəbər lenti

Hər problem cərimələməklə həll olunmur: Bilik üçün şərait yaradın!

Hər problem cərimələməklə həll olunmur: Bilik üçün şərait yaradın!

Ekspertlər nə repetitorda, nə də ki, şagirddə günah görür: onlar dərs keçməyə məcburdurlar

 

Hüquq-mühafizə orqanlarının əməkdaşları vaxtaşırı xüsusi karantin rejimi dövründə fəaliyyət göstərən repetitorları müəyyənləşdirir və cərimələyirlər. Belə ki, Tərtər Rayon Polis Şöbəsinin əməkdaşları rayon sakini Mehriban Mehdiyevanın rayonda yerləşən özünə məxsus fərdi yaşayış binasında repetitorluq fəaliyyəti apardığını aşkar ediblər.

 

Xüsusi karantin rejimi qaydalarını pozduğu üçün müəllim İnzibati Xətalar Məcəlləsinin müvafiq maddəsi ilə cərimələnib və 11 şagirdin valideynlərinə xəbərdarlıq edilib.

 

Təhsil mütəxəssisi Nigar Qadaşova AYNA-ya bildirib ki, karantin müddəti ərzində repetitorlar tələbələri qəbul etməyə davam edirlər. Bunun əsas səbələrindən biri, həm müəllimlərin özləri, həm də tələbələrin internet və kompüter problemlərinin olmasıdır. Bəzilərinin heç telefonu da yoxdur.

 

“Hazırda Gəncədəyəm və demək olar ki, burada internet yoxdur. Əlbətdə ki, uşaqlar onlayn dərs ala bilmirlər və yalnız bir yol var - əvvəlki kimi repetitor yanına getmək. Belə vəziyyət ölkənin bir çox yerində hakimdir və indi istəmədən qanunu pozanların sayı çoxdur. Əgər belə getsə, o zaman ölkənin yarısı cərimələnməli olacaq. Bu məsələdə yalnız repetitorları və övladlarını onların yanına göndərən valideynləri günahlandıra bilmərik. Sadəcə başqa bir seçimləri yoxdur, çünki tələbələrin bilik əldə etməsi, müəllimlərin isə bu biliyi paylaşması və işlərinə görə pul almaları lazımdır”, - deyə Qardaşova vurğulayıb.

Karantində gizli işləyən hazırlıq mərkəzi aşkarlandı - Foto

Mütəxəssisin fikrincə, əlbəttə ki, müəllimlərin uşaq hazırlaşdırması üçün müəyyən qaydalar tətbiq etmək olardı: “Məsələn, tələbələri bir-bir qəbul etmək, sosial məsafəni qorumaq, həm özləri, həm də şagirdlərin maska taxması, dərslərin keçirildiyi otağın lazımi dərəcədə təmizlənməsi və s. qaydalar tələb kimi qoyula bilərdi. Ancaq praktikada bu sadəcə işləməyəcək. Məsələn, bir gözəllik salonunda müştəri qəbul edən bir bərbərin təyin olunmuş qaydalara əməl edib-etmədiyini yoxlamaq asandır, müəllimlər isə şagirdləri evlərində qəbul edirlər”.

 

“Tələbə maska taxaraq müəllimin yanına gəlsə də, heç kim bilmir, bəlkə də 5 dəqiqədən sonra onu çıxaracaq. Yaxud da, müəllim on nəfər əvəzinə tələbələri bir-bir qəbul edərsə, sözün əsl mənasında bir dəqiqə boş vaxtı olmayacaq”, - deyə ekspert vurğulayıb.

 

Onun sözlərinə görə, əlavə olaraq, belə bir fərdi yanaşma ilə dərslərin qiymətini artırmalı olacaq və şagirdlərin valideynlərindən çoxu buna razı olmayacaq: “Xüsusən də, bir çox ailənin gəlirlərinin azaldığı bir vaxtda. Beləliklə, qrup dərsləri qalacaq və bu bir riskdir. Belə vəziyyətdə, bu cür fəaliyyətlərin karantin dövründə niyə qarşısının alınması və iştirakçıların məsuliyyətinə ümid etməməsi başa düşüləndir. Ancaq belə vəziyyətdə həm müəllimlər, həm də şagirdlər bundan əziyyət çəkirlər”.

 

Qadaşova qeyd edib ki, bəzi müəllimlər texniki problemlər üzündən yox, internet formatına öyrəşmədiklərindən, ənənəvi tədris formasını dəyişə bilmədiklərindən, həddindən artıq mühafizəkar olduqlarından tələbələrlə birbaşa işləməyi üstün tuturlar: “Repetitorlar bəzi hallarda canlı ünsiyyəti daha keyfiyyətli və daha təsirli hesab etdikləri üçün buna üstünlük verirlər”.

 

Qadaşovanın dediyi kimi, bəzən belədir - ancaq bu vəziyyətdə  qarışıq bir yanaşmadan istifadə edilə bilər. Yəni, müəllimlər çox vaxt onlayn dərs verə bilər və ayda bir-iki dəfə birbaşa ünsiyyət üçün bütün təhlükəsizlik qaydalarına riayət edərək tələbələrlə bir-bir görüşə bilərlər.

 

Təhsil Nazirliyi yanında İctimai Şura sədrinin müavini Nadir İsrafilov da AYNA-ya deyib ki, internetlə bağlı problemlər və lazımi cihazların çatışmazlığı çox vaxt müəllimləri cərimələnmə riski altında qoysa da, dərsləri pandemiyadan əvvəlki rejimdə keçirməyə məcbur edir.

 

Ekspert pandemiya zamanı repetitorluq üçün hansısa normanın tətbiq edilməsinin faydasız olduğuna əmindir, çünki onların həyata keçirilməsini izləmək mümkün olmayacaq.

 

Davamlı İnkişaf Araşdırmaları Mərkəzinin sədri Nəriman Ağayevin sözlərinə görə, repetitorluq sahəsində o qədər də sərt müdaxilə olmamalıdır. Çünki şagirdlər pandemiyaya baxmayaraq, bütün ölkə daxilində bilik almaq hüququna malikdirlər. Artıq yeni koronavirus ştammları ortaya çıxdı və pandemiyanın nə qədər davam edəcəyi məlum deyil, lakin bu, bilik almağa mane olmamalıdır.

 

Ekspert deyib ki, istənilən halda repetitorluq prosesini asanlıqla təşkil etmək mükündür: “Bir repetitorun əlində koronavirusdan sağalmasını və ya ümumiyyətlə xəstələnməməsini təsdiq edən test nəticəsi varsa, niyə normal işləyə bilmir? Əlbətdə ki, lazımi standartlara tabe olaraq işləyə bilər və bu, müəllimin özünün mənafeyinə uyğundur. Eyni zamanda, müəllim 15 nəfəri bir-birindən 1,5 metr məsafədə oturdaraq dərs keçə bilər. Sanitariya və Epidemioloji Nəzarətin dərslərin keçirildiyi binalara girişi olmalıdır”.

 

Mütəxəssisin fikrincə, ən optimal yol,  pandemiya dövründə işləməyən bəzi müəssisələrin otaqlarında dərslərin keçirilməsini təşkil etmək və nəzarət orqanlarının yoxlamasını həyata keçirməsini asanlaşdırmaq üçün orada videokameraların quraşdırılmasını təşkil etmək olar.

 

“İnsanlara bu çətin dövrdə seçim təklif edərək, pul qazanmasına kömək etməliyik. Əksinə, onları cərimələrlə cəzalandıraraq buna mane olmamalıyıq”, - deyə ekspert fikrini yekunlaşdırdı.

 

Müəllif: Elya Belskaya      13 Yanvar 2021 19:20
Cəmiyyət bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin