İntihar edənlərin “sevimli” ayı başladı: Kimi sevgilisinə, kimi müdirinə görə...

İntihar edənlərin “sevimli” ayı başladı: Kimi sevgilisinə, kimi müdirinə görə...

Mütəxəssis: “İntiharlar üçün ən təhlükəli vaxt səhər saatlarıdır, ən təhlükəli gün isə cümədir”

 

Ötən 2 sutka ərzində Bakıda 5 intihara cəhd faktı qeydə alınıb. AYNA xəbər verir ki, bu barədə oxu.az-a hüquq-mühafizə orqanlarındakı mənbələrdən məlumat veriblər.

 

“Instagram” şantajı

 

Belə ki, iyulun 30-da Binəqədi rayonunda, 1982-ci il təvəllüdlü Biləcəri qəsəbə sakini Q.S. 10 ədəd ketotifen həbi udaraq ağır vəziyyətdə Klinik Tibbi Mərkəzə çatdırılıb.

 

İlkin araşdırma zamanı müəyyən edilib ki, qız tanışı Əli adlı şəxsin hərəkətlərinə görə depressiyaya düşüb. Əli “Instagram”da qızın yarıçılpaq vəziyyətdə şəkillərini paylaşıb. Q.S onunla “Instagram”da tanış olub. Faktla bağlı araşdırma aparılır.

 

Naməlum səbəb

 

15 yaşlı başqa bir qız da Nərimanov rayonunda intihar məqsədilə həblər udub. İyulun 30-u gecə saat 02:00-da akademik Həsən Əliyev küçəsindəki evlərdən birində yaşayan, 2004-cü il təvəllüdlü A.O. dərman preparatından zəhərləndiyinə görə Klinik Tibbi Mərkəzə çatdırılıb.

 

Hazırda onun vəziyyəti orta ağırdır. Qızı bu addımı atmağa sövq edən səbəb hələ məlum deyil.

 

Ata-bala münaqişəsi

 

Çərşənbə axşamı, 1985-ci il təvəllüdlü Hüseyn Nuriyev də intihara cəhd edib. O, Vaqif prospektindəki körpüyə (Nərimanov rayon ərazisi) çıxıb və oradan özünü atmağa çalışıb.

 

Lakin polis əməkdaşları onunla profilaktik söhbət apardıqdan sonra H.Nuriyev fikrini dəyişib. O bildirib ki, atası ilə münaqişə etdiyinə görə intihar etmək istəyib.

 

Qadınla “toqquşma”

 

Bundan başqa, iyulun 30-da, 1985-ci il təvəllüdlü Ağstafa sakini Nemət Əliyev Nizami rayonunda venasını kəssə də, xoşbəxtlikdən sağ qalıb. Buna qədər kişinin bir qadınla münaqişəsi olub.

 

Müdirə etiraz

 

Həmçinin, iki fəhlə - Həmid İsgəndərov və Razi Musayev iyulun 30-u saat 11:40-da Nizami rayonunda M.Əliyev küçəsindəki reklam lövhəsinə çıxıb. Onlar “Yapı Taahhüt ve Ticaret Anonim Şirkəti”nin işçiləri olublar.

 

Fəhlələr tikinti şirkətinin rəhbərinin addımlarına qarşı etiraz əlaməti olaraq intihar yolunu seçiblər. Lakin hüquq-mühafizə əməkdaşlarının işə qarışmasından sonra işçilərə olan borc ödənilib.

 

60 yaşdan sonra…

 

Səbail rayonunda da intihar faktı qeydə alınıb. 1957-ci il təvəllüdlü Aslanov Ramiz Yusif oğlu evində özünü asıb. İntiharın səbəbi məlum deyil. Faktla bağlı təhqiqat aparılır.

 

Niyə avqust ayı?

 

Səhiyyə Nazirliyinin Psixi Sağlamlıq Mərkəzinin direktoru, professor Fuad İsmayılov deyib ki, intihar risklərinin artması baxımından avqust təhlükəli ay hesab edilir.

 

“Niyə, məhz avqustun olduğunu demək çətindir – bu, mütəxəssislərin müşahidələrinin nəticələridir. İntiharlar üçün ən təhlükəli vaxt səhər saatlarıdır, ən təhlükəli gün isə cümədir”, - psixiatr bildirib.

 

Onun sözlərinə görə, Azərbaycan intiharların sayına görə digər ölkələrdən geri qalır: “2015-2016-cı illərdə son iki illə müqayisədə daha çox intihar baş verib. Həmin vaxt maliyyə böhranı, banka olan borclar və totalizatorlar (idman mərc oyunları) intiharların artmasına güclü təsir göstərib”.

 

Ümumdünya Səhiyyə Təşkilatının (ÜST) məlumatına görə, Azərbaycanda hər 100 min nəfərə 4,3 intihar düşür. Müqayisə üçün bildirək ki, bu göstərici Kanadada 15,1, ABŞ-da 21,1, Rusiyada 48,3, Türkiyədə 11,3, Fransada 17,9, İsveçdə isə 15,8-dir.

Müəllif: Ayna.az      1 Avqust 2019 14:29
Cəmiyyət bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin