Əsas səhifə Haqqımızda Xəbər lenti

Qəbələdə ağac kəsən şəxslər cəzalandırılıb

Qəbələdə ağac kəsən şəxslər cəzalandırılıb

İctimai tənbeh o vaxtadək olmalıdır ki, insanlar ağac kəsməyi özlərinə ar bilsinlər

 

Şahdağ Milli Parkının əməkdaşları tərəfindən Milli Parkın Qəbələ bölməsinin Bum meşəbəyliyinin ərazisində müxtəlif cinsli 16 ağacın kəsildiyi və təbiətə 4218 manat məbləğində ziyan dəydiyi müəyyən edilib.

 

Ekologiya və Təbii Sərvətlər Nazirliyindən AYNA-ya daxil olan məlumatda bildirilir ki, araşdırma zamanı ağacların Qəbələ rayon Tikanı kənd sakinləri Asim və Hidayət Şəfiyevlər tərəfindən kəsildiyi aşkar edilib. Faktla bağlı qanun pozucuları barəsində akt tərtib olunub.

 

Dəymiş ziyanın məbləği cinayət tərkibi yaratdığından məsələyə hüquqi qiymət verilməsi və təqsirkar şəxslər barəsində qanunamüvafiq tədbirlərin görülməsi üçün toplanmış sənədlər Qəbələ rayon Prokurorluğuna göndərilib.

 

ETSN Qəbələ rayonunun əhalisinə, xüsusilə də Tikanı kəndinin sakinlərinə, kəndin icra nümayəndəliyi və bələdiyyəsinə, kənd ağsaqqallarına müraciət edərək bildirir ki, meşə sahələrinə belə münasibət göstərənlərə qarşı sərt mövqe tutsunlar, tənbeh edib, qınağa çəksinlər.

 

“İctimai tənbeh, ictimai ifşa o vaxtadək olmalıdır ki, insanlar ağac kəsməyi, meşə sahələrinə ziyan vurmağı özlərinə ar bilsinlər, ağac kəsilməsini ən qəddar, insanlığa yaraşmayan hadisə kimi qəbul etsinlər”, - deyə nazirliyin məlumatında vurğulanıb.

Müəllif: Ayna.az      1 İyul 2020 16:07
Xəbərlər bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin