Türkiyə Milli Müdafiə Nazirliyi süni tənəffüs aparatı istehsal edib

Türkiyə Milli Müdafiə Nazirliyi süni tənəffüs aparatı istehsal edib

Koronavirus pandemiyasına qarşı bütün dünyada mübarizə tədbirləri görülür

 

Türkiyənin Milli Müdafiə Naziri Hulusi Akar Makina və Kimya Sənayesi Təşkilatı (MKEK) tərəfindən yerli və milli imkanlardan istifadə edilərək, “Səhra” adı verilən mexaniki süni tənəffüs aparatı istehsal edildiyini bildirib.


Türkiyənin koronavirus ilə amansız mübarizə apardığını deyən nazir Milli Müdafiə Nazirliyinin də bu mübarizədə üzərinə düşən öhdəliyi yüksək səviyyədə yerinə yetirməyə çalışdığını vurğulayıb: “Bu mübarizədə uğur qazanmaq üçün lazım olan hər şeyi etdik və etməyə də davam edirik.”


H.Akar Müdafiə Nazirliyinin imkanlarını inkişaf etdirərək qoruyucu tibbi ləvazimatların istehsalında əhəmiyyətli addımlar atdıqlarını qeyd edib:


“Maskalar, kombinezonlar, dezinfeksiyaedici maddələrin istehsalı davam edir. İstehsal gücümüzü gündən-günə artırırıq. Silahlı Qüvvələrimizin, Səhiyyə Nazirliyi vasitəsilə isə xalqımızın ehtiyaclarını ödəməyə davam edirik. Digər tərəfdən, dost və müttəfiq ölkələrin ehtiyaclarını ödəmək üçün Cənab Prezidentimizin tapşırıqlarına uyğun olaraq lazımi tədbirləri davam etdiririk. Eyni zamanda, dizaynı və istehsalı tamamilə yerli və milli olan “Səhra” mexaniki süni tənəffüs aparatını da istehsal etdik. Bu bir prototipdir. Yaxın günlərdə əməkdaşlarımız onun üzərində çalışaraq daha da təkmilləşdirəcəklər. Səhiyyə Nazirliyində müvafiq şöbələr və digər qurumlar tərəfindən təsdiqlənmə prosesi var. Bu prosesi mümkün qədər sürətləndirməklə kütləvi istehsala başlayacağıq.”


Nazir həmçinin “Səhra”nın dünyadakı oxşar cihazlardan daha ucuz başa gəldiyini və hədəflərinin həftədə 500 ədəd mexaniki süni tənəffüs aparatı istehsal etmək olduğunu deyib.


Akar tamamilə yerli və milli imkanlarla istehsal olunan cihazın dizaynında və istehsalında əməyi olanları təbrik edib:


“Bir tərəfdən Silahlı Qüvvələrimizin, digər tərəfdən isə dəyərli insanlarımızın ehtiyaclarını ödəmək üçün Səhiyyə Nazirliyi ilə əlaqəli şəkildə fəaliyyətimizi davam etdirəcəyik.”

Müəllif: Ayna.az      18 Aprel 2020 16:29
Dünya bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin