Azərbaycanda gender bərabərliyinə dair daha bir addım atılır

Azərbaycanda gender bərabərliyinə dair daha bir addım atılır

Ekspert: “Dəyişiklik irqi, sosial ayrı-seçkilik kimi halların qarşısını almaq üçün nəzərdə tutulub”

 

Əmək qanunvericiliyinin təkmilləşdirilməsi işləri çərçivəsində Əmək və Əhalinin Sosial Müdafiəsi Nazirliyi (ƏƏSMN) tərəfindən hazırlanmış, “Azərbaycan Respublikasının Əmək Məcəlləsində dəyişikliklər edilməsi haqqında” yeni qanun layihəsində Məcəlləyə “Ailə vəzifələri olan işçi” anlayışının əlavə edilməsi də nəzərdə tutulur.

 

Nazirlikdən "Report"a  bildirilib ki, məcəllənin 3-cü maddəsinə nəzərdə tutulan əlavədə “Ailə vəzifələri olan işçi” anlayışı “himayəsində olan uşaqlarla, eləcə də həkim məsləhət komissiyasının rəyinə əsasən qulluğa və köməyə həqiqətən ehtiyacı olan digər ailə üzvləri (atası, anası, babası, nənəsi, əri (arvadı), uşaqları (o cümlədən övladlığa götürülənlər), doğma və ögey bacıları və qardaşları, nəvələri, ərinin (arvadının) valideynləri, qardaşları, bacıları) ilə münasibətdə ailə vəzifələri olan kişi və qadın işçi” kimi təqdim edilir.

 

Bununla paralel olaraq Əmək Məcəlləsinin “Əmək münasibətlərində ayrı-seçkiliyin yolverilməzliyi” adlanan 16-cı maddəsinə əlavə edilərək müəyyən ediləcək ki, əmək münasibətlərində digər amillərlə yanaşı “ailə vəzifələri” amilinə görə də ayrı-seçkiliyə yol verilməsin.

 

Qeyd olunan dəyişiklikdə məqsəd milli qanunvericiliyin Azərbaycanın qoşulduğu Beynəlxalq Əmək Təşkilatının "Kişi və qadın işçilər - ailə vəzifələri olan işçilər üçün bərabər imkanlar və bərabər rəftar haqqında" 156 nömrəli Konvensiyasına uyğunluğunu tam təmin etməkdir.

 

Məsələni AYNA-ya şərh edən mülki hüquq üzrə ekspert Ruslan Hümbətovun sözlərinə görə, Azərbaycan Respublikasının Konstitusiyasında mal və əmək hüquqları maddəsi əmək qannvericiliyin tərkib hissəsidir: “Bu səbədən də Əmək Məcəlləsində dəyişiklik edilə bilər. Eyni zamanda, Azərbaycan Beynəlxalq Əmək Təşkilatının üzvü olduğu üçün üçün bu konvensiyalara qoşulur”.

Hümbətov Beynəlxalq Əmək Təşkilatının konvensiyasına da toxunub: “11 may 2010-cu il tarixində Beynəlxalq Əmək Təşkilatının “Kişi və qadın işçilər üçün bərabər imkanlar və bərabər rəftar” haqqında 156 nömərli konvensiyasının 3-cü maddəsinə əsasən, kişi və qadın işçilərin bərabər imkanlarının təmin edilməsi üçün, hər bir dövlətin milli siyasəti olmalıdır. Bu da ondan ibarətdir ki, ailə vəzifəsi olan şəxslər hüquqi ayrı seçkiliyə mərzu qalmasınlar. Yəni onlar üçün yüngülləşdirici şərait yaradılsın. Bu maddənin də 3-cü bəndində istifadə olunan ayrı-seçkilik termini 58 nömrəli konvensiyanın 1-ci və 5-ci maddələri ilə müəyyən olunub”

 

“Bu maddə həm də, Əmək Məcəlləsinin 16-cı maddəsinin 1 və 5-ci hissəsində, ailə vəzifələrinə görə ayrı-seçkiliyə yol verilməmək, yəni ki, işə götürülərkən irqi ayrı-seçkilik, sosial ayrı-seçkilik kimi halların qarşısını almaq üçün nəzərdə tutulub. Həmin anlayışa görə, bu hallarda artıq məhkəməyə müraciət etmək olacaq. Bu barədə artıq bir neçə dəyişiklik nəzərdə tutulub. Ki, bunu da gələcək göstərəcək”, - deyə ekspert vurğulayıb.

Müəllif: Mərahim Nəsib      9 Sentyabr 2019 13:01
Cəmiyyət bölməsinə aid digər xəbərlər
Ən çox oxunanlar