Muəllif:

«Sosial müdafiçilər» dələduz və oğru adıyla məhkəməyə göndərildilər

Üzdəniraq «sosial müdafiəçilərin» yeni bir dəstəsi qanun qarşısında cavab verəcəklər. Qaradağ rayon Əhalinin Sosial Müdafiəsi Mərkəzinin vəzifəli şəxsləri barəsində olan cinayət işi baxılması üçün məhkəməyə göndərilib.
Onlar yoxsul insanlar üçün ayrılmış pulları mənimcəməkdə, dələduzluqda və saxtakarlıqda ittiham olunurlar.

Baş Prokurorluq mətbuat xidmətindən bildirilir ki, ƏƏSMN Qaradağ rayon Əhalinin Sosial Müdafiəsi Mərkəzinin baş məsləhətçisi Şahin Əsədovun Bakı şəhər sakinindən ünvanlı sosial yardım təyin edilməsi üçün 200 manat məbləğində pulu rüşvət kimi alması faktına görə Baş prokuror yanında Korrupsiyaya qarşı mübarizə idarəsində CM 311.1-ci (rüşvət alma) maddəsi ilə cinayət işi başlanaraq istintaq aparılıb. Müəyyən edilib ki, rayon ƏSMM-nin direktoru Rəhman Yusifov 2008-2012-ci illər ərzində mərkəzin Ünvanlı sosial yardım və sosial müavinətlər sektorunun əməkdaşları Şahin Əsədov, Mirabdulla Seyidov, Pərviz Rəhimov və Rəşad Əbilov ilə cinayət əlaqəsinə girib mütəşəkkil dəstə yaradaraq ünvanlı dövlət sosial yardım təyin edilməsi müqabilində mərkəzə müraciət etmiş 174 rayon sakinindən xidməti vəzifələrinin icrası ilə əlaqədar 193 min 354 manat məbləğində külli miqdarda pulu rüşvət kimi tələb edərək 187 min 208 manat pul alıb. Bundan başqa öz cinayətkar əməllərini davam etdirən dəstə üzvlərindən Şahin Əsədov, Mirabdulla Seyidov və Pərviz Rəhimov hər biri ayrı-ayrılıqda ünvanlı sosial yardım ayrılmış vətəndaşların etibarından sui-istifadə edib aldatma yolu ilə onların plastik kartlarını ələ keçirərək bankomatlardan ümumilikdə 69 min 729 manat pulu çıxarıb külli miqdarda özgə əmlakını ələ keçirərək mənimsəyib. Həmçinin mərkəzin baş mühasibi Gülarə Əhmədova plastik ödəniş kartlarının vətəndaşlara təqdim edilməsini təsdiq edən vərəqələri banka təhvil verilməsi barədə aktlara bilə-bilə yalan məlumatlar daxil edib imzalamaqla vəzifə saxtakarlığı və mütəşəkkil dəstənin dələduzluq və mənimsəmə cinayətləri törətmələrinə şərait yaradıb vətəndaşların və dövlətin qanunla qorunan mənafelərinə ağır zərər vurub.

Mərkəzinin direktor müavini və Ünvanlı sosial yardım və sosial müavinətlər sektorunun müdiri Vüsal Rzayev isə mərkəzin əməkdaşlarına aztəminatlı ailələrə ayrılmış pul vəsaitlərini dələduzluq və mənimsəmə yolu ilə talamalarına şərait yaradaraq vətəndaşların və dövlətin qanunla qorunan mənafelərinə ağır zərər vurmaqla səhlənkarlıq edib.

Törətdikləri cinayət əməllərinə görə Şahin Əsədova CM 178.3.2 (dələduzluq), 179.3.2 (mənimsəmə və ya israfetmə), 311.3.1 (qabaqcadan əlbir olan bir qrup şəxs və ya mütəşəkkil dəstə tərəfindən rüşvət alma) və 311.3.3-cü (külli miqdarda rüşvət alma), Rəhman Yusifova CM-in 308.2 (vəzifədən sui-istifadə etmə), 311.3.1 və 311.3.3-cü, Pərviz Rəhimova CM-in 178.3.2, 179.3.2, 311.3.1 və 311.3.3-cü, Mirabdulla Seyidova CM-in 178.3.2, 179.2.2, 179.2.3, 179.2.4, 311.3.1 və 311.3.3-cü, Rəşad Əbilova CM-in 311.3.1 və 311.3.3-cü, Gülarə Əhmədovaya CM-in 308.2 və 313-cü (vəzifə saxtakarlığı), Vüsal Rzayevə isə CM-in 314.2-ci (səhlənkarlıq) maddələri ilə ittiham elan edilib. Cinayət işi baxılmaq üçün Bakı Ağır Cinayətlər Məhkəməsinə göndərilib.

Звёзд: 1Звёзд: 2Звёзд: 3Звёзд: 4Звёзд: 5Звёзд: 6Звёзд: 7Звёзд: 8Звёзд: 9Звёзд: 10
Oxunma sayı: 89